ग्राम यात्रा मार्च २०२६

  ग्राम यात्रा मार्च २०२६

कहि सकैत छी जे गाम जाएब कोन बात भेलैक जे बेर-बेर ओही विषयपर लिखल जाए।से अहाँ सोचि सकैत छी।मुदा जीवन सभक लेल एक रंग नहि होइत छैक।कोनो बात ककरो लेल बहुत मामुली भए सकैत छैक,मुदा ओएह घटना ककरो लेल जानलेबा बनि जाइत छैक।तखन? कहबाक बात ई जे हमरा लेल गामक यात्रा सभ दिनसँ विशेष अनुभव दैत रहल अछि।सन् ‍१९७७मे पहिल बेर दिल्लीमे नौकरी शुरू करबाक समयसँ आइ धरि ई क्रम कोनो-ने-कोनो रूपमे चलिते रहल अछि। एहि बीचमे हम युवकसँ बृद्ध भए गेलहुँ।बच्चासभ प्रौढ़ भए गेलाह।पोता-पोती सभ से आबि गेलथि। मुदा समय? ओ तँ अपना हिसाबे चलिते रहल।की गाम आब ओएह अछि जे पहिने रहए जखन हम नेना रही,जखन युवक भए गेल रही आ आब? ई संभव नहि छैक। दुनिआ परिवर्तनशील अछि,सभ किछु निरंतर बदलि रहल अछि।परिस्थिति,मानव स्वभाव,सामाजिक परिवेश सभ किछु बदलि रहल अछि तखन मनुक्ख कोना पाथर जकाँ अटल रहि सकत?

सबाल ई  नहि अछि जे गाम गेलासँ के भेटताह,के नहि भेटताह? पहिने ओहिठाम चली तँ। यात्राक आनन्दे अपना आपमे बहुत महत्वपूर्ण होइत अछि।यदि से प्राप्त भए गेल तँ आर जे होएत ,नहि होएत से भेल ऊपरी,बोनस।पछिला बेर जखन हमसभ गाम गेल रही तखन दिआबातीक समय रहैक।गाममे अपन नवनिर्मित घरमे दीप जरेबाक रहैक। ताहि लेल हमसभ पूरा तैयारी कए लेने रही। थोड़बे दिनक बाद छठि पाबनि रहैक। अपना ओहिठामक लोकसभ  छठिमे गाम अबैत रहथि। मुदा हमसभ ओही समयमे वापस भए गेल रही। कैक गोटे टोकबो केलथि। दरभंगा टीसनपर सरकार आगन्तुकलोकनिक लेल बड़काटा सामियाना लगओने छल। विशेष ट्रेनसभ चलाओल गेल छल। मुदा हमसभ गाममे पन्द्रह दिनरहलाक बाद वापसी ट्रेनसँ दिल्ली चलि आएल रही। मुदा तखनहि सोचि लेने रही जे अगिला बेर गाम जाएब तँ एकमास रहब। असलमे पाबनिमे गामसँ बेसी ग्रेटर नोएडामे अपन घरमे रहब बेसी नीक लगैत अछि।कारण एहिठाम बच्चासभ संगमे रहैत छथि। हुनका लोकनिकेँ कुदैत,फनैत देखि मोनमे आनन्द होइत अछि।से बात आब गाममे नहि रहि गेल छैक।अस्तु, हमसभ  फगुआक बाद ‍१० मार्च २०२६क बिहार संपर्क क्रान्ति एक्सप्रेससँ बिदा भेल रही।

नओ मार्च २०२६क विहार संपर्क क्रान्तिसँ हमरासभकेँ जेबाक छल। ताहि लेल हमसभ दू मास पहिने टिकट कटा लेने रही। हमरा दुनू बेकतीक द्वितीयश्रेणी एसीमे नीचाँक शायिका आरक्षित छल।हमसभ ओहि दिन  सही समयपर ट्रेनमे बैसि गेल रही।ट्रेन सही समयपर खुजिओ गेलैक। असलमे एहि ट्रेनक इएह विशेषता छैक जे ई समय पर चलैत छैक आ समयपर भोरे  साढ़े नओ बजेक आसपास दरभंगा पहुँचा दैत छैक। ओहिठामसँ घंटा भरिक भीतरे गाम पहुँचि सकैत छी।ओना दिल्लीसँ दरभंगाक लेल हबाइ जहाजक सुविधा सेहो आब भए गेल छैक। मुदा ट्रेन यात्राक आनन्द अलग होइत छैक। ई बात हमर सहयात्री सेहो बजैत रहथि। ओ रोसड़ाक वासी छलाह। ओहिठाम हुनकर दूटा नामी होटल चलैत छनि। एकटा दोसर सहयात्री समस्तीपुरक आसपासक गामक छलाह। एहि तरहेँ हमसभ चारि गोटे ओहि ठाम बैसल रही। हुनका लोकनिक शायिका ऊपरका छलनि। तथापि,दिनुका समयमे तँ सभ गोटे बैसले रही।आपसमे गप्प-सप्प करैत समय नीकसँ बीति रहल छल।

जेना-जेना समय बीति रहल छल,ट्रेनक गति बढ़िते जा रहल छल।लागि रहल छेना ओ रेल लाइनपर सँ छड़पि कए उड़ए लागत।खिड़कीसँ बाहर देखू तँ गजबकेँ दृश्य देखाइत। चारू कात,खेतसभमे गहुमक पाकल-पाकल झाबासभ।कतहु-कतहु नील गाएसभक झूंड सेहो देखा जाइत।आब युरोप जकाँ पवनचक्कीसभ सेहो अपनासभक बाधमे देखाइत। ट्रेनक भीतरक  वातावरण कम मनोरंजक नहि छल। रहि-रहि कए तरह-तरहक सामानसभ बेचैत  फेरीबलासभ। दही,चाह,काफी,पानि,बिस्कुट,नमकीन बेरा-बेरी आबि रहल छल,जा रहल छल। हमसभ दही बलाक अबाज सुनि कए ओकरा रोकलिऐक-

“की रेट छै?”

“चालीस रूपया।”

हम हुनका इसारासँ पुछलिअनि-

“अहूँ लेबै?”

ओ मना कए देलथि।हम एकटा दहीक कप देबाक लेल कहलिऐक।ओकरा एक सए रूपयाक नोट देलिऐक।ओ साठि टाका वापस कए देलक।तकर बाद ओ चलि गेल।हम दहीक कपपर लिखल दाम पढ़लिऐक। लिखल रहैक-

“अधिकतम मूल्य-पैंतीस रूपया।”

हमरा भेल जे ओ पाँच रूपया बेसी लए लेलक। बात पाँच रूपयाक नहि छलैक।यदि ओ एहिना आरो यात्रीसभकेँ बेसी लैत रहत तँ कतेको गोटेकेँ क्षति हेतैक।कनी कालक बाद ओ दोबारा देखाएल।ओकरा देखिते हम कहलिऐक-

“दहीक दाम पैंतीस रूपया लिखल छैक।तखन तूँ हमरासँ चालीस रूपया किएक लेलह?”

ओ हमर बात सुनलक आ आगू बढ़ि गेल जेना किछु सुनबे नहि केने होअए।

कनी कालक बाद टिकट चेकर अएलाह।हम हुनका टिकट देखेलाक बाद  दहीक दाम बला गप्प कहलिअनि। मुदा ओहो ई बात सुनि लेलाह।तकर बाद हम अपन मोबाइल फोनक रेलवन ऐपपर सिकाइत केलहुँ। तकर बाद तँ धराधर ठेकेदार पहूँचल। ओ गप्प कइए रहल छल कि दही बला सेहो आबि गेल।कहलक-

“हम तँ कहने रही चाचा।खुदरा पाइ नहि छै।की करिऐ?कनी कालक बाद हम अपने दए जाएब।अहाँ कहलिऐक-“कोनो बात ने बेटा।”

ठीकेदार ओकर बातक सहमतिमे बुझाएल।हम कहलिऐक-

“गलत बाजि रहल छह।ने तूँ हमरा चचा कहलह,ने हम तोरा बेटा कहलिअह।तूँ तँ हमर बात सुनि कए सोझे चलि गेल छलह।”

दही बला हमरा दस रूपया देलक।हम ओकरा पाँच रूपया वापस कए देलिऐक। तकर बाद ओ बेर बेर एतबे कहए जे कागजपर फीडबैक लिखि दिऔक।एही बीचमे एकटा फोनो आएल-

“अहाँक सिकाइति निपटि गेल ने।कनी फीडबेक नीक दए देबैक।”

“किछु नहि भेलै।हम तँ तखनसँ  खाली एतबे सुनि रहल छी जे फीडबैक नीक दए देबैक।”

से कहि हम फोन काटि देलिऐक।दही बला माहौल देखि खसकि गेल।

ठेकेदार फेर नुरिआइत आएल।

“फीडबैक दए दितिऐक ने।”

हम जखन गाम पहुँचि जाएब,तखन सभ बातक ध्यान राखि फीडबैक पठा देबह।ताहिसँ पहिने किछु नहि।यदि तणग करबह तँ ओहि फीडबैकमे ईहो बात लीखि देबह जे सिकाइत केलाक बाद सभ गोटे मिलि कए खाली फीडबैक,फीडबैक चिचिआ रहल अछि।

आखिर ओ चलि गेल।

कनी कालक बाद ठेकेदार ओकरा फेर पुछलकैक-

“फीडबेक देलकौ कि नहि?”

“जाए ददहक।बड्ड रद्दी आदमी बुझाइत छै।”

हम अपने कानसँ ओकर वक्तव्य सुनि दंग रही।

कनी कालक बाद चाह बला आएल।ओकरा लगमे कैक तरहक चाह रहैक। हम ओकरा दू कप आद बला चाह देबाक लेल कहलिऐक।

“चाहक दाम कतेक छैक?”

“बीस रूपयामे एक कप।दू कपक चालीस रूपया।”

हम ओकरा चालीस रूपया दए देलिऐक।ओ चलि गेल।हमसभ चाह पीबि लेलहुँ। तकर बाद मोन भेल जे रेलवेक रेटलिस्टमे एकर दाम देखिऐक।बहुत रास सामानसभक भाओ देल रहैक। मुदा आदबला चाहक दाम देले नहि रहैक।चाह बला जखन फेर आएल तँ हम पुछलिऐक-

“रेलवेक सूचीमे तँ चाहक दाम मात्र दस रूपया लिखल छैक?”

“जेहन चाह लेबैक तेहने दाम लागत ने।”

“मुदा तूँ चाहक पर्ची किएक ने दैत छहक?”

“किएक ने देबै।जे मंगै छै तकरा दै छिऐ।ओना कतेक के दैत रहबै।”

ओ जेबीमे हाथ देलक आ दूटा छापल परची हमरा लग खसा देलक।

“मुदा ई कहह जे चाह आधे कप किएक दैत छहक?दामो बेसी आ चाहो आधा?”

एहि बातक हमर सहयात्री लोकनि सेहो समर्थन केलनि। ओ कहलक-

“बेसी पानि देबै तँ चाहक स्वाद बेकार भए  जाएत।ओना अहाँक मरजी।”

आगूसँ ओ भरि कप चाह देनाइ शुरू केलक। सहयात्री लोकनिकेँ सेहो तकर फएदा भेलनि। एहि तरहेँ समय बीति रहल छल।क्रमशः जेना-जेना सहयात्री लोकनि आपसमे गप्प-सप्प करए लगलथि,यात्रा आर मनोरम होइत गेल।

नीचाँक दुनू शायिका हमरा दुनू बेकतीक छल। मुदा दिनक समयमे ऊपरको यात्रीसभ नीचे बैसल रहलाह। ओहिमे सँ एकटा रोसड़ाक प्रसिद्ध होटल व्यवसायी छलाह। हुनकर खिस्सा बहुत रमनगर अछि। ओ अपन परिचय दैत कहालह जे ओ पहिने ओ कोनो निजी नौकरी करैत छलाह। हुनकर पटिदार सरकारमे कोनो पैघ अधिकारी रहथिन।दियादी कुन्नहक कारण हुनका नौकरीसँ  निकलबा देलखिन। तकर बाद ओ गाम वापस आबि गेलाह। जेना-तेना किछु टाकाक जोगार केलाह आ एकटा भोजनालय शुरू केलाह। ओहिठाम शुद्ध घीमे बहुत उत्तम भोजनक व्यवस्था रहैत छल। गुणात्मक दृष्टिए बहुत उत्तम रहबाक कारण ओ भोजनालय जल्दीए प्रसिद्ध भए गेल। ओहिठाम लोकसभक पाँति लागल रहैत छल। देखाउसमे अगल-बगल कैकटा भोजनालय खुजल।मुदा ककरो चललैक नहि। जल्दीए ओ एकटा आर भोजनालय खोलि लेलनि। दुनू भओजनालय इलाकामे प्रसिद्ध भए गेल। क्रमशः ओ आर जमीन कीनि कए रहबाक लेल होटल सेहो खोलि लेलनि। आब तँ ई हाल छनि जे ओहिठाम लोककेँ भोजन करबाक लेल आ रहबाक लेल जगह नहि भेटैत छैक। समय-समयपर ओ दिल्ली आ दोसरो ठाम जाइत रहैत छथि। मुदा हुनका हबाइ जहाजसँ यात्रा करब पसिंद नहि छनि। ओ ट्रेनेसँ बेसी यात्रा करैत छथि।

“हबाइ जहाजमे किछुओ देखबाक अवसर नहि भेटैत छैक। बैसू आ उतरि जाउ।ट्रेनक यात्रा बेस मनोरंजक होइत अछि। एक सँ एक लोकसँ भेंट-घाँट होइत छैक। समय नीकसँ कटि जाइत छैक। गप्प-सप्पमे ओ बहुत जानकारी देलनि। हुनकर कहबाक रहनि जे होटलक भोजन स्वास्थवर्धक नहि होइत अछि। यद्यपि ओ स्वयं दूटा होटलक मालिक छथि,मुदा होटलक भोजन साइते कहिओ करैत होएताह। होटलक पनीरक बनल तरकारी तँ जहर होइत अछि। कदापि नहि खएबाक चाही।”हुनकर कहबाक रहनि जे बजारमे उपलब्ध पनीर सही भइए नहि सकैत अछि। कारण ओकरा सस्ता करबाक लेल ओहिमे बहुत तरहक मिलाबट कएल जाइत अछि। अस्तु,होटलक ,अथवा बाहरक पनीर नहि कीनबाक चाही,ने खेबाक चाही।

हमरासभक संगे दोसर सहयात्री छलाह समस्तीपुर लगक कोनो गामक। ओ दिल्ली अबैत-जाइत रहैत छथि। हुनकर काजे तेहने छनि। ओ अपन इलाकासँ मजदूरसभकेँ दिल्लीमे  काज दैत छथिन। दिल्लीक ठीकेदारसभ हुनकर संपर्कमे रहैत छनि। जखन जतेक,जाहि प्रकारक लोकक काज भेलनि,तखन ओकर व्यवस्था ओ कए दैत छथिन।तकर इबजमे हुनका कमीशन भेटैत छनि।एहने किछु काजसँ ओ दिल्ली गेल रहथि आ आब गाम वापस भए रहल छथि। मुदा रस्तेमे एकटा तेहन समाचार भेटलनि जे मोन व्याकुल कए देने छनि। गाममे घरसँ श्रीमतीजी फोन केने छलखिन।केओ कैक कठ्ठा गहुन काटि लेलकनि अछि। हुनका अपन दिआदेपर सक छलनि।खिछु झंझटि चलि रहल छलनि।मौका देखि कए जखन ओ गामसँ बाहर छलाह,ओ सभ बिदति कए देलकनि। आब की करताह? ताहिपर मंथन कए रहल छलाह। श्रीमतीजीकेँ आवश्यक समाद दए चुकल छथिन।गाम पहुँचबाक देरी छनि। तकर बाद हिसाब-किताब सभ चुकता कए देथिन। ओ वारंबार इएहसभ बाजि रहल छलाह।

हमसभ रातिमे भोजनक लेल आनलाइन व्यवस्था केने रही। हुनको सएह करबाक मोन भेलनि।मुदा से केना हेतनि,तकर जनतब नहि छलनि।तेँ हमरा आग्रह केलाह।हम अपन मोबाइलसँ रेलवन एपक मदतिसँ हुनकर भोजन बुक कए देलिअनि। रातिमे सही समयपर हुनकर पसिंदक भोजन आबि गेलनि।एहि बातसँ ओ बहुत प्रसन्न रहथि।एहिसँ पूर्व किछु यात्री ट्रेनक भीतरेमे उपलब्ध भोजन कीननने रहथि। मुदा ओ सभ  भोजनक गुणवेत्तासँ संतुष्ट नहि रहथि।तकर बादे हम हुनका बाहरसँ भोजनक जोगार बतओने रहिअनि जे सफल रहलनि।

जेना-जेना राती बीतैत गेल,यात्रीसभ फोंफ काटि रहल छलाह आ ट्रेन भयाओन गतिसँ आगू बढ़िते जा रहल छल।हमरा निन्न नहि भए रहल छल। हम राति भरि करोट बदलैत रहलहुँ। आब ट्रेन अन्हरोखे समस्तीपुर पहुँचि रहल छल। दुनू सहयात्री अपन गंतव्यपर  पहुँचि गेल छलाह।हमरा लोकनिक आपसी संपर्क सेहो ओतहि समाप्त भए रहल छल। ओ सभ अपन-अपन सामान सहित ट्रेनसँ उतरि गेलाह। हमहूँसभ आब एहि बातसँ खुस रही जे दरभंगा आबहि बला अछि। भेल जे एहि बीचमे शौचसँ निवृत भए जाइ। मुदा शौचालय निरंतर भरले रहैत छल,चाहे एहि कात जाउ कि ओहि कात।आखिर बड़ी कालक बाद हमरोलोकनिकेँ अवसर भेटल।शौचालयक हाल बेहाल छल। चारूकात पानि छप-छप करैत छल।पानिक फ्लसकेँ बड़ी जोरसँ दबाउ तँ पानि फुच दए निकलत,से कखन केमहर खसि पड़त कोनो ठेकान नहि। बेरा-बेरी  शौचसँ निवृत भए हमसभ चाह पीलहुँ।आब थोड़बे  कालमे लहेरिआसराय टीसन आबि जाएत।तेँ हमसभ अपन सामान नीचाँ ऊपर शायिकापर राखि लेलहुँ।पानिक बोतलमे आधा पानि रहि गेल छल।ओकरा ओतहि छोड़ि देलिऐक। देखिते-देखिते  ट्रेन लहेरिआसरायसँ आगू बढ़ि गेल।ट्रेन लहेरियासराय गुमती टपि गेल। मोन पड़लाह आदरणीय डाक्टर योगानन्द झाजी। हुनकर घर एमहरे छनि।

“ई तँ बलभद्रपुर मोहल्ला अछि।हमसभ एहिठाम अबैत-जाइत रही।हमर ससुरक डेरा एतहि छलनि।”

ट्रेन सीटी दैत-दैत दरभंगा जंक्सनपर पहुँचि गेल।हमरसभक यात्राक अंत भए रहल छल।हमसभ अपन सामानक संग आब बाहर भए रहल छलहुँ। गाम जेबाक लेल आटो ठीक करबाक क्रममे कैकटा आटो बला घरि लेलक।आब की करी? पहिने बाहर तँ निकली। सएह केलहुँ।आटोबलासभ जकरा जे मोन होइक से दाम बता रहल छल।

“हौ,हम कोनो आनठामक नहि छी। एना किएक कए रहल छह?जे उचित किराया छैक से बाजह।”

आखिर एकटा आटोबला सात सएमे अड़ेर डीहटोल धरिक लेल तैयार भए गेल।हमसभ ओहिपर बैसि गेलहुँ।आटो कनीके आगू बढ़ल छल कि एकटा युवक आटोबलाकेँ इसारासँ कटमनी देबाक आग्रह केलकैक। ओ चालीस टाका देबाक लेल तैयारो भेलैक। मुदा ओकरा एक सए चाही।बस विवाद शुरू भेल। आखिर ओकरा एक सए देबहि पड़लैक।आटोबला अपन दुखनामा सुनबैत आटोकेँ आगू बढ़ा देलक।

आटो बला दरभंगा हबाइ अड्डा बाटे हमर गामक रस्ता धेने छल। कतेक सालसँ हमसभ एहि रस्तापर अबैत-जाइत रहलहुँ अछि। बीचमे तँ ई सड़क बहुत खराप भए गेल रहए।मुदा आब बहुत नीक स्थितिमे अछि। बीचमे कपिलेश्वर महादेव स्थान आएल। हुनका प्रणाम करैत हमसभ आगू बढ़ि गेलहुँ। आब आटो रहिका आबि गेल छल। ओतए उतरि सुधाक दूध,दही,चूरा,पेरा,चाहक पत्ती आ चिन्नी कीनलहुँ जाहिसँ गाम पहुँचलाक बाद चाह पीबाक आनन्द उठा सकब आ जलखैमे चूरा-दही ।आटो फेर बिदा भेल। आटो बला बेर-बेर दरभंगामे दलाल द्वारा एक सए लेबाक चर्चा करैत रहैत छल। ओकर इच्छा रहल हेतैक जे हम ओतेक किराया बढ़ा दिऐक। गाम पहुँचलाक बादो ओ एकर चर्चा केबे केलक।मुदा हम तय किराया दए ओकरासँ फारकत भेलहुँ। कैक मासक बाद एक बेर फेर हम अपन घर पहुँचि गेल रही।दिन भरि सफाइ चलैत रहल,तहन जा कए ओ घर रहए जोगर भेल।एहि बीच हमसभ  नित्यकर्म कए आश्वस्त भए अपन घरक चाह पीलहुँ।मोन बहुत हल्लुक लागि रहल छल। यद्यपि ट्रेन यात्रा कुल मिला कए सुखदे छल,तथापि यात्रामे समय तँ लागिए जाइत छैक,दिनचर्या अस्त-व्यस्त भइए जाइत छैक।हबाइ जहाजसँ समय कम लगैत छैक ,मुदा ओहूमे कैक बेर अनिश्चितता भए जाइत छैक,जेना कि पछिला बेर हमरासभकेँ भेल रहए।जे से। आब तँ गाम पहुँचिए गेल रही।

 

गाम पहुँचलहुँ।

एहिसँ पूर्व हमसभ अक्टूबर २०२५मे दिआबातीक समयमे गाम गेल रही आ छठिसँ पहिने चलि आएल रही।बीचमे करीब चारि मास समय बीति गेल। मकानक ऊपरी भागमे काज चलिए रहल छल।नीचाँक भागमे भीतरी काज भए गेल रहए।तकर बाद मई २०२५मे हमसभ गृहप्रवेश कए लेले रही। ऊपरी भागमे  भए रहल काजक कारण नीचाँ  पानि टपकैत रहबाक कारण देबालसभ भीजल-भीजल लगैत छल। सभसँ खराप हालति तँ भनसाघरक छल। लागि रहल छल जेना पानिक पाइप कतहु टूटि गेल होइ।मुदा हमर भातिज,चंदन,कहलक जे पाइप नहि टूटल अछि।देबाल बहुत भिजि गेल छैक। हबा,रौद लगतैक तँ अपने सुखा जाएत।नीचाँक टाइलसभ सेहो पानिसँ भीजल छल। घर बंद रहबाक कारण एहन स्थिति बनल छल। हमसभ जल्दी-जल्दी खिड़की केबाड़ खोललहुँ। पलंग,केबाड़,खिड़कीसभमे कैकठाम फुफुंद लागि गेल छल। ओकरासभकेँ साफ करओलहुँ।ओछाओनसभ बाहर केलहुँ। ओकरासभकेँ झाड़ि-पोछि ओछाओल गेल। दिनभरिक प्रयासक बाद घर एहि स्थितिमे आबि गेल जे हमसभ रातिविश्राम नीकसँ कए सकब।घरमे भोजनो बनेबाक जोगार भए गेल। ताहि लेल जरूरी सामानसभ चंदन हाटपरसँ आनि देलक।काजबाली यथासाध्य खैत रहल। तथापि,ओकरा अखन बहुत किछु करबाक रहैक। जे ओ क्रमशः करत। खिड़की,केबाड़,ग्रीलसभमे बाहरी देबालमे  प्लास्टर होएबाक कारण सीमेंट लागि गेल छल। ओकरा कैक दिन धरि साफ कराओल गेल।ताहि लेल चंदन पेंटरक जोगार केलक।मधुबनीसँ लाल मिस्त्री अबैत -जाइत रहलाह। तखन जा कए घरक काजसभ सही भेल। शुरूक पन्द्रह दिन एहीसभमे बीति गेल।पन्द्रह दिन आओर रहबाक छल। हमसभ सोचलहुँ जे आब आर बिदति नहि करी।आब किछु आनन्दो उठाबी।तेँ काजक आर असार-पसार नहि कएल गेल। ओना नव मकानमे तँ काज लगले रहैत छैक।

एहि बीच गामेमे ठेलापर तरकारी बेचनिहारसँ संपर्क भए गेल। ओ तेसर दिनक टटका तरकारी दैत रहताह।हाटपरसँ सुधाक दूध-दही आनि लैत छलहुँ।किछु जरूरी  लटगेनासभ सेहो भोरे टहलि कए वापस अबैत काल कीनि ली।एहि तरहेँ हमरा लोकनिक ग्राम-प्रवास आब सुखद भए गेल छल।

हमसभ एहि बेर सोचि कए आएल रही जे गाममे एक मास रहब जाहिसँ किछुओ गोटेसँ संपर्क भए सकए,किछु पुरान लोकसभ जे गाममे रहैत छथि,तिनकासभसँ भेंट-घाँट भए सकए। घरमे जे किछु विकास काज करब जरूरी छल से करबा सकब। ओना आब जरूरीक सभ सामान हमसभ अपन गामक घरमे जोगार कए चुकल छी।पहिने सोचने रही जे एसी लगाएब,मुदा आब तत्काल से जरूरी नहि बुझा रहल अछि। किछु आर सुविधासभक जोगार कालक्रमे जेना-जेना आवश्यक लागत,करैत रहब से सोचने छी। आगू ईश्वरक इच्छा।

प्रात भेने भोरे पाँच बजे उठलाक बाद चारूकात अन्हारे छल।कनी कालक बाद टहलबाक लेल बिदा भेलहुँ।कनीके आगू गेलहुँ तँ प्रबोधजी भेटि गेलाह। दुनूगोटे सड़कक काते-काते थोड़े काल टहललहुँ।मुदा हमरा सड़कपर टहलबामे डर भए रहल छल। हम ई बात हुनका कहलिअनि।दुनूगोटे निर्णय केलहुँ जे काल्हिसँ लक्ष्मीपुर बाधमे टहलल करब।

दोसर दिनसँ हमसभ अपन टहलबाक रस्ता बदलि लेलहुँ। कुटीसँ आगू बढ़ैत लक्ष्मीपुर टोलसँ आगू जाइत-जाइत हमसभ नागदहक पूलक आसपास पहुँचि जाइत छलहुँ। भोरक समय ,चारू कात खेत,गाछ-बिरिछ बहुत रमनगर लगैत छल। बाधमे तीनू कातसँ तरह-तरहक लाउडस्पीकरक अबाज सुनबामे अबैत।नागदह दिससँ संस्कृतक श्लोकसभक प्रसारण होइत रहैत छल। जमुआरी दिससँ भजनसभ सुनाइत। रस्तामे हमरा टोलक कैकगोटे टहलैत भेटि जइतथि। कैक दिन नागेन्द्र यादबजी सेहो भेटितथि। नागदह दिससँ कैक गोटे भेटि जइतथि। हम तँ किनको चिन्हि नहि सकिअनि।प्रबोधजी हुनका लोकनिक बारमे बादमे बतबितथि। बच्चामे हम कैक दिन बाबा संगे लक्ष्मीपर बाधमे मकइक रखबारी करए,कहिओ धान कटबए जाइत रही। कैकटा पुरान बातसभ मोन पड़ैत रहैत छल।

चैती दुर्गापूजा

 किछु दिनक बाद चैती दुर्गापूजा शुरू भेलैक।पहिने अपनसभक ओहिठाम चैती दूर्गापूजा बहुत कम ठाम होइत छलैक।धकजरीमे बाबू साहेबसभक कोठीपर होइत छलनि। एकाध बेर हमहूँ ओतए गेल रही। मुदा आब लक्ष्मीपुर टोलमे भटमाना इसकुल लग सेहो ई पूजा होइत अछि। नागदहमे तँ होइते अछि। एहि अवसरपर दस दिन धरि  माहौल भक्तिमय बनल रहल। लाउडस्पीकरसभपर भजन-कीर्तन जोर-सोरसँ सुनाइत रहैत छल।अपना ओहिठाम लाउडस्पीकर बजाएब आम बात छैक। मुदा एहिसँ भए रहल ध्वनि प्रदूषणपर ककरो ध्यान नहि जाइत छैक। भोरक नीरव वातावरणकेँ अनेरे दुषित करैत चारूकात बजैत लाउडस्पीकरसभ प्रकृति प्दत्त प्राकृतिक सौंदर्यकेँ नष्ट  कए रहल छल। मुदा से के बुझत? बाजा बजबाक चाही ,ओहो सस्तासँ सस्ता।जकरा जे होएबाक हेतेक से हेतैक।

केओ कहलक जे भटमाना इसकुल प्रांगणमे भए रहल चैतीपूजाक मेलामे कैकटा गड़बड़ घटनासभ सेहो घटित होइत रहैत अछि।एहने किछु बात हालेमे भेल रहैक।आसपासक दू टोलक दू भिन्न जातिक लड़का-लड़की आपसमे  गप्प केलक आ गामसँ भागि गेल।सुनबामे आएल जे बादमे ओ सभ कानूनी रूपसँ बिआहो कए लेलक। इलाकामे एहि लेल किछु दिन बहुत तनाओ छल। ई होएबाक चाही,ई नहि होएबाक चाही ,होइत रहल। कोट-कचहरी,थाना-पुलिस पर्यन्तक परिस्थिति उत्पन्न भए गेल। कहाँ दनि ओ सभ बेनीपट्टी न्यायालयमे सहमतिसँ बिआह करबाक घोषणा केलक आ ईहो प्रमाणित केलक जे ओ सभ वालिग अछि ,समाजक किछु गोटे ओकरासभकेँ प्रताड़ित कए रहल छथि आ हुनकासभकेँ बचाओक लेल पुलिस सुरक्षा देल जाए।सोचबाक बात अछि जे समाजमे एहन परिस्थिति उत्पन्न किएक भेल? कानून आ समाज एक धरातलपर नहि चलि रहल अछि,तकरे ई कुपरिणाम बुझना जाइत अछि।

काम क्रोध मद लोभ की जौ लौं मन में खान ।
तौ लौं पण्डित मूरखौं तुलसी एक समान ।।

एहि बेरक ग्राम यात्राक अंतिम चरणमे हमसभ भोरमे टहलबाक लेल दक्षिण दिसक रस्ता पकड़लहुँ। तकर एकटा प्रमुख कारण ई छल जे गामक धारक माटि काटि-काटि कए बान्हपर रखि देने रहैक। तेँ रस्ता तँ बंद भइए गेल रहैक,माटि बहुत महकबो कए रहल छलैक।लोक नाक मुनि कए ओकरा टपैत छल। मुदा जखन महादेव मंदिर दिस बिदा भेलहुँ तँ बहुत नीक लागल। कनीके आगू बढ़लापर पुरंदरजीक घर छनि। ओ हमरासभकेँ सामनेसँ जाइत देखि चिचिआ उठलाह। ततेक आग्रह केलाह जे हमरासभकेँ हुनकर चाह पीबए पड़ल। सिनेहसँ सिक्त ओहि चाहक स्वादक वर्णन असंभव। चाह पीलाक बाद हमसभ तीनूगटे टहलबाक लेल आगू बढ़लहुँ। कलमे-कलम रस्ता छल। एक दिस नवनिर्मित घरसभ आ दोसर दिस आमक गाछसभ। ओहमे कैकटा सारासभ सेहो देखाएल। कलममे केओ बरजिस कए रहल छलाह तँ केओ प्रातः भ्रमण। आगू बढ़लापर महादेव मंदिर आबि गेल। बहुत पहिने  बच्चामे बाबाक संगे हम ओहिठाम कैक बेर गेल छी। ओहि इसकूलक व्यवस्था समितिसँ ओ जुड़ल छलाह आ तकरे बैसार होइत छलैक। पौना बला पंडितजी प्रधानाचार्य छलाह।सिमरीक ज्योतिषी सेहो ओतए कार्यरत छलाह।हमरे गामक डाक्टर सच्चिदानन्द झाजी एहि मंदिरक जीर्णोद्धार करओलनि ,से बात ओतए लिखल देखाएल। आब सूर्योदय भए गेल रहैक। लोकसभ जागि गेल छल। तेँ टहलबामे एकांतक आनन्द नहि आबि रहल छल। वापसीमे विवेकाजी ( स्वर्गीय घूरन बाबूक पुत्र)  सेहो भेटलाह। एकांतक संग-संग प्राकृतिक दृश्यक बहुलताक कारण एमहर टहलनाइ बहुत सुखद बुझाएल।

भास्करक ग्रामयात्रा

एहि बेर हमरा लोकनिक गाम गेलाक बाद  हमर दुनू पुत्र सपरिवार गाम जएबाक कार्यक्रम बनओने रहथि। हमर ज्येष्ठ पुत्र,भास्कर २१ मार्चह २०२६क हबाइ जहाजसँ दरभंगा होइत गाम पहुँचलाह। मुदा कोनो कारणवश मोनू(क्षितिज मिश्र)  नहि बि सकलाह। एहिसँ पूर्व ओ सोलह साल पहिने मायक एकादशी यज्ञमे गाम आएल रहथि। माए बहुत खुस भेल रहए।यज्ञक लेल गाए ओ कीनि देने रहथिन। ताहि बातसँ माएक प्रसन्नताक अंत नहि छल। फेर सोलह सालक बाद अपन नवनिर्मित घरमे आबि सोनू (भास्कर मिश्र)  बहुत खुस भेलथि। गाममे बहुत पानि भेल रहैक।रस्तासभमे पानि लागि गेल छलैक।तथापि,हमसभ गामक ब्रह्मस्थान आ अन्य प्रमुख स्थानसभ हुनका संगे घुमलहुँ। प्रात भेने उच्चैठ भगवती,भवानीपुर आ पण्डौल सेहो हुनका संगे  घुमलहुँ। गाममे किछु बच्चाक दोस्तसभसँ सेहो हुनका भेंट भेलनि।एक्के दिनक बाद हुनका वापसो जएबाक रहनि। मुदा एतबे समयमे हमरा लोकनि बहुत रास गप्प-सप्प केलहुँ। हुनको मोन बहुत हल्लुक लागि रहल छलनि। तेसर दिन भेने ओ हबाइ जहाजसँ वापस दिल्ली चलि गेलाह। निस्सन्देह हुनकर ग्राम यात्रा बहुत दिनक बाद ओहो बहुत कम समय लेल छलनि,मुदा हमरा सभकेँ बहुत नीक लागल।गाममे घर बनाएब सफल भेल,से बात हमसभ दुनू बेकती आपसमे बतिआइत रहलहुँ।

लालक योगदान

गाममे गृहनिर्माणमे मधुबनीक बढ़इ,लालक बहुत योगदान रहल छल। हुनका बारेमे हम पहिनहु लिखि चुकल छी।मकान बनि गेलाक बादो ओ निरंतर संपर्कमे रहलथि आ घरक छोट-पैघ काजसभ  हमर अनुपस्थितियोमे करैत रहलथि। एहू बेर हुनका फोन केलिअनि। फोन करिते ओ गाम आबि गेलाह। तखनसँ जा धरि हम गाममे रहलहुँ ओ अबिते रहलथि आ कैकटा जरूरी काजसभ केलथि।घर बंद रहलासँ पलंग,केबार,चौकठिसभमे फुफुंद लागि गेल रहैक। तकरा ओ बेरा-बेरी साफ केलनि आ फेरसँ रंगबो केलनि।बाहरी ओसारापर ऊपर दिस किताव रखबाक लेल रैक बनओलथि।अंत-अंत धरि ओ  अपन योगदान दैत रहलथि। आजुक समयमे एहन लोक निश्चय बहुत दुर्लभ अछि।

श्रीनारायणजीसँ भेंट

जखन गामपर  व्यवस्था किछु ठीक भए गेल तखन बीस मार्च २०२६क हमसभ दुनू बेकती श्रीनारायणजीक मधुबनी स्थित घरपर हुनकासभसँ भेंट करबाक लेल पहुँचलहुँ। एहि बीचमे श्रीनारायणजी अपन बारीमे  उपजल तरह-तरहक साग-सब्जी,फलसभ सेहो देखोलनि। हुनकर दोसर घराड़ीपर  नव गेट लागि गेल छनि,ओहिमे केराक बड़ीटा धर लटकल छै। आर-आर कैक तरहक चीज-वस्तुसभ ओहिमे रोपल छै,सभ किछु ओ देखओलथि। श्रीनारायणजी आब पूर्ण स्वस्थ भए गेल छथि। हुनकर श्रीमतीजीसँ सेहो हुनका खूब गप्प भेलनि। हमसभ भरि दिन ओहिठाम रहलहुँ,गप्प-सप्प केलहुँ,भोजन केलहुँ आ चारि बजे ओहिठाम छोटूआटो बलाक आटोसँ गाम बिदा भए गेलहुँ। जाइत-जाइत श्रीनारायणजीकेँ सपरिवार  अपना ओहिठाम अएबाक आग्रह केलिअनि जे ओ स्वीकार कए लेलनि।

तीस मार्च २०२६क श्रीनारायणजी सपरिवार हमरा ओहिठाम ( अड़ेर डीह)  अएलथि। हुनकर आगमनक कैकदिनसँ प्रतीक्षा भए रहल छल। बीचमे हुनका ओहिठाम काजसभ चलि रहल छलनि। हमर घरे लग उपनयन से रहैक। से सभ देखैत आइ अएबाक हुनकर कार्यक्रम बनलनि।एहिसँ पूर्व ओ गामक घरक गृहप्रवेश कार्यक्रममे आएल रहथि। भरि दिन गप्पसप्प चलैत रहलैक। बादमे ओसभ बरहाबाली भौजीसँ भेंट करबाक लेल गेलथि आ ओहीठामसँ मधुबनी चलि जाइत रहलाह।श्रीनारायणजीसँ भेंट होएब,हुनका ओहिठाम जाएब,हुनकर हमरा ओहिठाम आएब ई सभ कतेक आनन्ददायी छल,तकर वर्णन करब मोसकिल।चौसठिवर्षसँ  लगातार हुनकासँ एहिना जीवंत संपर्क बनल अछि से मामुली बात नहि थिक। जगदंबा हुनका स्वस्थ रखथुन आ हमरा लोकनिक सिनेह,संपर्क एहिना बनल रहल से हुनकासँ प्रार्थना।

डाक्टर कीर्तिनाथझा

पछिला साल जखन हम गाममे मकान बनबैत रही तखने डाक्टर कीर्तिनाथ झाजीसँ कैकबेर संपर्क भेल छल।ओहो अपन गाममे घर बनबैत छलाह।बीचमे गाम दिस आएलो रहथि । हमरा लोकनिक इच्छा रहए जे भेंट-घाँट होअए। मुदा से नहि भए सकल। कीर्तिनाथ बाबूसँ पछिला कैकसालसँ संप्रकमे छी। हुनकर कैकटा यात्रा प्रसंगसभ  कोलकातासँ प्रकाशित मैथिली मासिक पत्रिका,मिथिला दर्शन,मे छपैत रहलनि अछि।से सभ पढ़बाक अवसर भेटल छल। हुनकर व्लागपर समय-समयपर बहुत ज्ञानवर्धक लेखसभ अबैत रहैत अछि। ओहोसभ हम पढ़ैत रहलहुँ अछि। हमरो कैकटा रचनासभ ओ पढ़ने छथि आ समय-समयपर अपन मंतव्य दैत रहलाह अछि।स्वाभाविक रूपसँ हुनकासँ भेंट करबाक जिज्ञासा बढ़िते जा रहल छल। हमसभ मार्चमे एकमास लेल गाम जाएब से जानकारी हुनका देने रहिअनि।तखने ओ कहने रहथि जे एहि बेर अबस्स भेंट होएत। से सही साबित भेल। एहि बेर फेर ओ गामक मकानक काजसँ अबाम आएल रहथि।यद्यपि मकानक रंगाइ-पोताइक काजमे ओ बाझल रहथि,तथापि पलखति भेटितहि ओ एक मार्च २०२६क तीन बजेक आसपास अएलाह। हुनका अपना ओहिठाम देखि बहुत प्रसन्नता भेल।हमर गामक नवनिर्मित घरक ओ पहिल साहित्यकार पाहुन छलाह। हमसभ बड़ीकाल धरि समसायिक साहित्यिक विषयपर चर्चा जरैत रहलहुँ। एही बीच ओ हमर छोटसन साक्षात्कारो अपन मोबाइए फोनपर लेलथि। हुनकर  एहि अपनत्व भाओ देखि दंग रहि गेलहुँ। लगभग डेढ़घंटा धरि हमसभ बतिआइत रहलहुँ। आब हुनका जएबाक छलनि। यद्यपि एहन पाहुनसँ फराक होएब निश्चित कष्टकर छल,तथापि जतबे काल ओ रहलथि,बहुत सुखद अनुभूति दए गेलथि।  हुनकर आगमन आ बिदाइ दुनू बहुत आनन्ददायी आ स्मरणीय रहल। हुनकर सहृदयताक जतेक प्रशंसा कएल जाए से कमे पड़त।

डाक्टर कीर्तिनाथ झा आँखिक बड़का डाक्टर छथि। फौजमे कर्नल पदसँ सेवानिवृत्तिक बाद पांडिचेरी स्थित मेडिकल कालेजमे नेत्र विभागमे प्रोफेसर रहथि। आब बंगलोरमे रहैत छथि। चिकित्सा क्षेत्रमे व्यस्त रहितो ओ मैथिलीमे निरंतर लिखैत रहैत छथि। चाहे गामक विषयमे होइक,कोनो यात्रा प्रसंग होइक किंवा मैथिली साहित्यसँ जुड़ल कोनो समस्या होइक,डाक्टर साहेब निधोख लिखैत छथि। हुनकर कोनो रचना पढ़ि लिअ ,लागत जेना ओकर एक-एक शब्द बजैत अछि,खन-खन करैत अछि,मौलिकता आ विद्वतासँ परिपूर्ण अछि।

हुनकर प्रमुख प्रकाशित कृति छनि-

‍१ जड़ि(कविता संग्रह) २००१ ई०

२ किछु पुरान गप्प,किछु नव गप्प(कथा संग्रह) २००५ई०

३ टूटल पाँखि(खलील जिब्रानक अरबी उपन्यासक मैथिली अनुवाद) -२०१६

४ तुरुवल्लवर कृत कुरलक मैथिली भावानुवाद २०१७ई०

५ गोरैया आ गई (बाल उपन्यास) २०२२ ई०

6.देखल-परेखल (निवंध संग्रह) २०२२ई०

७ लोहना रोडसँ लास वेगस (यात्रा प्रसंग) २०२०ई०

८ कन्नगीक काड़ाक कथा

उपरोक्त प्रकाशित पोथीक अतिरिक्त कीर्तिनाथजीक अनेक आलेख,संस्मरण,यात्रा प्रसंग,कथा हुनकर ब्लाग फेसबुकपर पढ़ल जा सकैत अछि।

डाक्टर कीर्तिनाथ झाक आत्मालाप नामसँ ब्लाग पर ( https://kirtinath.blogspot.com/) डाक्टर साहेब निरंतर लिखैत रहैत छथि। ओहि ब्लागक परिचयमे डाक्टर साहेब लिखैत छथि-“कीर्तिनाथक आत्मालाप, आत्ममंथनक क्षणमें हमर मनक दर्पण थिक ।“स्पष्टतः ब्लागमे ओ समसायिक विषयसभपर अपन बात बहुत स्पष्टतासँ रखैत छथि।

डाक्टर कीर्तिनाथ झाजी मैथिली भाषा आ साहित्यक अमूल्य योगदान अछि । एहन ओजस्वी आ प्रतिभाशाली मैथिली लेखकक सम्मान हेबाक चाही।

Facebook

https://www.facebook.com/photo?fbid=4126002767674703&set=pcb.4126003351007978

(https://youtu.be/AwHnx3NLVLM

कन्नगीक काड़ाक कथा: पाठकीय प्रतिक्रिया।)

सगर राति दीप जरए

सगर राति दीप जरए कार्यक्रम २८ मार्च २०२६ कए मधुबनी जिलाक लौकही प्रखण्ड अन्तर्गत नरहियामे सगर राति दीप जरय कार्यक्रमक आयोजन छल। एहिमे हमरो कथा संग्रह,गाछ बजैत छैक,क विमोचन होएबाक छल। हमसभ बहुत पहिनहिसँ एहि कार्यक्रममे सामिल होएबाक लेल तैयारी करैत रही। ताहि लेल टैक्सी ठीक कए लेने रही। ओहि दिन करीब अढ़ाए बजे हमसभ गामसँ बिदा भेलहुँ। मधुबनी,रामपट्टी होइत झंझारपुर लग अड़रिया संग्राम स्थित मिथिला हाट पहुँचलहुँ। ओहिठाम भीतर गेलाक बाद ग्रामीण आ सहरक वातावरणक अद्भुत समन्वय देखबामे अबैत अछि।मिथिला हाटक बीचमे बड़ीटा पोखरि अछि। ओहिमे छोटछीन नाओ सेहो चलैत देखाएल।पोखरिक चारूकात तरह-तरहक दोकानसभ देखाएल।कैकटा भोजनालय सेहो अछि जाहिमे मिथिलाक प्रसिद्ध भोजन,जलखैसभ उपलब्ध रहैत अछि। हमसभ तँ भोजन केने रही,तेँ मात्र लस्सी पीबि सकलहुँ। एकटा दोकानपर मधुबनी पेंटिंग कीनलहुँ। थोड़े काल एमहर-ओमहर घुमलहुँ आ वापस नरहियाक लेल बिदा भए गेलहुँ।

नरहिया दिस कार बढ़ले छल कि उमेश जीक फोन आएल।पता लागल जे ओहो जगदीश बाबूक संग जल्दीये नरहिया पहुँचि रहल छथि। नरहिया पहुँचि कए हमरासभकेँ कार्यक्रम स्थाल तकबामे  किछु देरी भेल । ताबत ओ सभ ओतए पहुँचि गेल रहथि। हमहुँसभ पीठेपर ओहिठाम पहुँचि गेलहुँ।कार्यक्रमस्थानपर किछु परिचितसभ बाहरेमे भेटि गेलथि। कनीके आगू गेलापर उमेशजी सेहो भेटि गेलथि। जगदीश बाबू सामनेमे बैसल भेटि गेलथि। अस्तु, हमसभ बहुत जल्दीए ओहिठाम आश्वस्त भए गेलहुँ। कार्यक्रम प्रारंभ होएबामे किछु देरी भए रहल छल ।कारण मुख्य अतिथि(जे स्थानीय वरिष्ठ पुलिस अधिकारी रहथि)  आ हुनकर सहयोगी लोकनि नहि आएल रहथि।एक बेर जखन कार्यक्रम शुरू भए गेल तँ चलिते रहल। सभागार लोकसभसँ भरल छल।

Facebook

https://www.facebook.com/photo/?fbid=4123609864580660&set=a.1388340294774311

हमर मैथिली कथा संग्रह,गाछ बजैत छैक,क लोकार्पण संपन्न भेल।लोकार्पणक समय संगमे वरिष्ठ साहित्यकार आदरणीय जगदीश प्रसाद मंडलजी,श्री सत्य नारायण साहुजी(सेवानिवृत्त महाप्रवंधक) ,प्रसिद्ध साहित्यकार आदरणीय श्री राज कुमार मिश्रजी एवम् कार्यक्रमक संचालक डाक्टर श्री उमेश मंडलजी ,(व्याख्याता मैथिली )सेहो उपस्थित रहथि।

 हमसभ साढ़े दस बजे राति धरि ओहिठाम रहलहुँ। एहि बीचमे जगदीश प्रसाद मण्डलजीसँ गप्प करबाक सेहो अवसर भेटल। अतिशय सरल आ सहज व्यक्तित्वक लोक छथि ओ। विनम्रताक प्रतिमूर्ति जगदीश बाबूसँ भेंट एहि कार्यक्रमक सभसँ पैघ उपलब्धि छल।श्री राज कुमार मिश्रजी आ डाक्टर विनीत कुमार लाल दासजीसँ पहिल बेर एहीठाम भेंट भेल।श्री लालदेव कामतजीसँ सेहो भेंट भेल। पहिनहु हुनकासँ भेंट भेल छल।ओ अपन नवका पोथी देलनि।ओ हमर कैकटा पोथीसभक समीक्षा लिखने छथि। तेँ हुनकासँ गप्प-सप्प कए बहुत आनन्द भेल।एहि कार्यक्रमक प्रथम सत्रक अंतमे मांगेलाल हनुमानमल चैरिटेबल ट्रस्ट द्वारा हमरा साहित्यकार सम्मानपत्र सेहो प्रदान कएल गेल।

 ओना हमरा एहिठाम भरि राति रहबाक कार्यक्रम छल।एकटा कथा पाठ सेहो करबाक योजना छल,मुदा से नहि भए सकल। श्रीमतीजी बहुत थाकि  गेल रहथि आ बेर-बेर जल्दी वापस जएबाक आग्रह केलथि। आखिर हमसभ  उद्घाटन सत्रक समापनक बाद ओहिठामसँ प्रस्थान कए गेलहुँ। रातिक समय रहैक, सड़क एकदम खाली  छलैक।  कार दनादन चलैत रहल। ठीक बारह बजे हमसभ अपन गामपर पहुँचि गेलहुँ।

गैस सिलिंडरक मारामारी

युद्ध भए रहल छलैक अमेरिका आ इरानक बीचमे,मुदा ओकर परिणाम अपनो देशमे  गामे-गाम सद्यः देखा रहल छल।हमरा गाममे चौकपर गैस सिलिंडरक वितरण केन्द्रपर भोरेसँ लोकसभक पाँति लागि जाइत छल। लोकसभ भरि-भरि दिन प्रतीक्षा कए एकटा सिलिंडर प्राप्त कए आह्लादित भए जाइत छलाह जेना कि कतेक मूल्यवान वस्तु भेटि गेल होनि।यद्यपि सरकार वारंबार घोषणा करैत रहल जे गैस सिलिंडरक कोनो कमी नहि छैक,मुदा लोक मानबाक लेल तैयार नहि बुझाइत छल । एहि युद्धक परिणाम गिलेसन बजारमे मखानक दामोपर बुझाएल। एक सप्ताहक भीतरे एकर दाममे प्रतिकीलो चारिसए सँ बेसीएक अंतर भए गेल छल। सड़कक काते-काते अपेक्षाकृत कम दामपर मखान बिका रहल छल।कालांतरमे एहि स्थितिमे सुधार भेल। ताधरि हम ग्रेटर नोएडा वापस आबि गेल रही।

अड़ेरमे  की नहि भेटैत छैक?

हम गाम गेल रही तखन आमक गाछसभमे मज्जर भरल छल। लागि रहल छल जे एहि बेर आम खूब फरत। मुदा एगारह मार्च २०२६क रातिमे बड़ी जोरक अन्हड़ अएलैक।सभटा मज्जर झरि गेलैक। साइते कोनो गाछ बाँचि सकल। गाम-घरमे मकान बनबाक क्रम अवाध रूपसँ चलिए रहल अछि। जेम्हरे नजरि देबैक,दूमहला चमकैत देखाएत। भवन निर्माण आ यातायातक क्षेत्रमे बहुत रास लोकसभकेँ जीविकाक जोगार भए गेल छैक।अड़ेर चौक तँ आब बेस समृद्ध बजार भए गेल अछि। कहि सकैत छी जे अड़ेरमे  की नहि भेटैत छैक।

गाममे रहलासँ तरह-तरहक सामाजिक कार्यक्रममे सामिल होएबाक अवसर भेटैत छैक। हमरासभकेँ गाम पहुँचलाक किछुए दिनक बाद हमर घरे लग उपनयन छल। ओहिमे आठ-नओ दिन धरि लाउज़स्पीकर बजैत रहल छल। ओहो जोर-सोरसँ। बहुत मोसकिलसँ बादमे ओकर अबाज कम कराओल गेल छल। आखिर उपनयन संपन्न भेल आ लाउडस्पीकर सेहो शांत भेल। भोज तँ होइते रहैत छल। हमरो कैकठाम भोजमे सामिल होएबाक अवसर भेटल। सबजाना भोजमे अखनहु परुषे सामिल होइत छथि। स्त्रीगणक लेल खैक जाइत छनि,मुदा ओहो संतोषप्रद नहि बुझाइत छल। समय-साल जखन एतेक बदलि गेलैक,तखनहि स्त्रीगणकेँ सबजाना नोतमे सामिल किएक नहि कएल जाइत छनि? किएक ने ओहोसभ भोजस्थलीमे सभक संगे बैसि कए भोजन कए सकैत छथि?बेसक हुनका लोकनिक लेल अलग पाँति रहए।मुदा चर्चा केलोपर एहि विचारक समर्थक लोकक बहुत अभाव बुझाएल।आन-आन गामसँ आबि पुरुषवर्ग भोजमे सामिल होइत छथि,मुदा अपने टोलक स्त्रीगण खैक अएबाक प्रतीक्षा करैत रहैत छथि,जे कैक बेर बारह बजे रातिमे पहुँचैत अछि,केक बेर सामानसभ घटि गेल रहैत छैक। जे से।

एहि बेरक ग्राम यात्राक आब अंत भए रहल छल।हमसभ ठीक एकमास गाममे बहुत सुखसँ रहलहुँ। एहिमे हमर भातिज ,चंदन,क बहुत योगदान रहलनि। हमरा लेल अंग्रेजी,हिन्दी अखबारक जोगार,बजारसँ समय-समयपर आवश्यक सामानसभक व्यवस्था ,मकानमे सफाइ काजक लेल मजदूरसँ पेंटर धरिक ओरिआन,एहन -एहन बहुत रास काजसभ  ओ बहुत सहृदयतासँ करैत रहलाह।हुनकर बच्चा ख्याति,बहुत आनन्द दैत रहल। ओ सदिखन अबैत-जाइत रहैत छलि जाहिसँ हमरा लोकनिकेँ अपनत्वक भाओ बुझाइत छल,बच्चा संगे खेलैत-बजैत समय बहुत नीकसँ बीति जाइत छल।पछिले बेर जकाँ एहू बेर हमसभ कपिलेश्वरक दहीक आनन्द लए सकलहुँ। ताहि लेल चंदन बहुत प्रयाससँ कपिलेश्वरक ओहि दोकानबलासँ कैक दिन पहिने दहीक आर्डर देलखिन ।तकर बाद आटोसँ बहुत प्रयत्नपुर्वक दहीकेँ गाम अनलनि।प्रयासक अछैत ओहिठामक नामी पेरा एहि बेर नहि भेटि सकलनि।हमसभ गोटे दही-चूरा भोजनक आनन्द उठओलहुँ।

गाममे एकमास रहलाक बाद दस अप्रैल २०२६क बिहार  संपर्क क्रान्तिसँ गामक सुखद यात्राक स्मृतिक संग हमसभ वापस दिल्ली बिदा भए गेल रही।

रबीन्द्र नारायण मिश्र

२९।०६।२०२६

 

 

 

 

 

 

 

 

 

 

 

 

 

 

 

अयोध्या लखनऊक यात्रा

 

अयोध्या लखनऊक यात्रा

 

हम ओहि दिन ग्रेटर नोएडा स्थित घरे मे रही। चारूकात लगैक जेना कर्फ्यु लागल छैक। पुलिसक जीप रहि-रहि कए आवासीय कालोनीसभमे घुमि रहल छल। बीच-बीचमे ओकर सायरन सेहो बाजि रहल छलैक।किछु बुझेबे नहि करए जे बात की छैक? हमरा नहि रहल गेल। टीवी खोललहुँ तँ देखैत छी जे उच्चतम न्यायालय अयोध्या राम मंदिर केसमे अपन निर्णय सुना रहल छल। निर्णय की भेल छल से तँ आब सौंसे दुनिआ जनैत अछि। निर्णयक कारण देशक माहौल खराप नहि होअए आ आपसी सद्भावना बनल रहि जाए,कोनो अप्रत्याशित घटना नहि घटए ताहि लेल उचित ओरिआन सरकार केने छल।मुदा,किछु गड़बड़ नहि भेल। शांति व्यवस्था बनल रहल।कालक्रममे अयोध्यामे भव्य राम मंदिर बनल आ तकर उद्घाटनो  भेल।शुरूमे तँ ओहिठाम दर्शनक लेल भयाओन भीड़ रहैत छल। एतेक तीर्थयात्रीकेँ ओतए उचित व्यवस्था करब बहुत कठिन काज छल। कहिओ काल गड़बड़ीक समाचारसभ सेहो अबैत रहल। हमरोसभकेँ ओहिठाम जएबाक इच्छा छल। मुदा,एतेक भीड़मे से संभव नहि बुझाएल।तेँ सोचलहुँ जे जखन ओहिठाम भीड़ कम होएत तखने जाएब जाहिसँ नीकसँ दर्शन भए सकत।हमसभ ओहि शुभ दिनक प्रतीक्षा करए लगलहुँ।एहि बीचमे बहुत समय बीति गेल। अयोध्यामे राम मंदिरक काज पूरा भए गेल। ओकर ऊपरमे धाजा फहरा गेल। “आबो तँ हमसभ ओतए जाइ”-ई बात हमर श्रीमतीजी कहलनि।

“कहि तँ सही रहल छी?”

“तखन तकैत की छी?टिकट कटाउ ।”

हमरासभ आपसी विमर्शक बाद टिकटक ओरिआनमे लागि गेलहुँ। भेल जे जखन अयोध्या जएबे करब तखन वापसीमे लखनऊओ घुमि लेब।ओहिठाम केन्द्र सरकारक होलीडेहोम छैक। ओहिमे रहबाक जोगार करए लगलहुँ।संयोगसँ बारह फरबरीसँ सोलह फरबरी धरि,पाँच राति ओहिठाम रहबाक आनलाइन आरक्षण  भए गेल। कहबाक काज नहि जे सरकारक होलीडे होममे रहबाक बहुत नीक ओरिआन रहैत छैक,सेहो बहुत कम दामपर।एसी दू बेडक कोठरीक लेल मात्र तीन सए रूपया देबाक होइत छैक।कतहु-कतहु तँ आर कम छैक।जेना कि पटनामे एहने कोठरीक लेल मात्र ‍१८० रूपया प्रतिदिन देबाक होइत छैक। भीआइपी कोठरीक लेल नओ सए रूपया लगैत छैक। ओहिमे दूटा बड़ी-बड़ीटा कोठरी होइत छैक।तकर हमरासभकेँ काज नहि रहए।मात्र दू गोटेक लेल तीन सए बला कोठरी एकदम पर्याप्त छल।हम सभसँ पहिने लखनऊमे रहबाक आरक्षण आनलाइन करबा लेलहुँ। तकर सूचना हुनका दए देलिअनि। आब प्रश्न छल जे पहिने लखनऊमे रहब कि सोझे अयोध्या चलि जाएब आ वापसीमे लखनऊ घुमैत-फिरैत ग्रेटर नोएडा वापिस भए जाएब?

“अयोध्या राम मंदिरमे दर्शन करब हमरसभक मुख्य उद्येश्य अछि।तेँ पहिने सोझे ओतहि चलब। ओहिठाम दर्शन आ भ्रमण केलाक बाद लखनऊमे ठहरब आ वापिस ग्रेटर नोएडा चलि आएब।”-ओ कहलथि।

“ठीक छैक।”

हम ओही हिसाबसँ आनन्दविहारसँ अयोध्या जएबाक लेल वंदे भारत ट्रेनमे टिकट लए लेलहुँ। ओना आनन्दविहारसँ ओ ट्रेन छओ बाजि कए दस मिनटपर खुजैत छैक। तकरा पकड़बाक लेल घरसँ पाँच बजेक आसपास निकलब जरूरी छल। पाँच बजे  प्रस्थान करबाक माने भोरे चारि बजे उठबाक छल। जाड़क मासमे भोरे चारि बजे उठि कए नित्यकर्म करब आ यात्राक लेल तैयार होएब मोसकिल बुझाइत छल। मुदा हनुमानजीकेँ ऊपर सभकिछु छोड़ि निश्चिन्त भए गेलहुँ।

आब अयोध्या जएबाक समय लगचिआ रहल छल। हमसभ अपन यात्राक लेल जरूरी सामानसभ सरिआ रहल छलहुँ ।ओहीक्रममे किछु जरूरी काजसँ एडब्लुएचओ सोसाइटी स्थित दोकानसँ काज कए लौटति रही कि ओहिठामक मंदिर समितिक अध्यक्ष भेटि गेलाह। ओ हमरा जनैत छथि। ओ कहलनि –

“हमर सोसाइटीमे मंदिरमे भगवानसभक प्राणप्रतिष्ठा कार्यक्रम आठ फरबरीसँ सोलह फरबरी २०२६क बीचमे आयोजित अछि। अपने ओहिमे एकदिन यजमान बनबाक लेल अपन सहमति दिअ। ”

“मुदा,हमरा तँ अयोध्याजी जएबाक कार्यक्रम अछि।”

“कहिआ?”

“दस तारीखक भोरे।”

“कोनो बात नहि। अहाँ नओ तारीखक लेल यजमान बनि जाउ।खंडुरीजीकेँ अपन नाम लिखा दिअनु।”

हम श्रीमतीजीकेँ एकर सूचना देलिअनि। ओ सहर्ष एहि लेल अपन सहमति देलनि आ कहलथि-

“लगैत अछि भगवानक अपना सभपर विशेष कृपा छनि। ओ चाहैत छथि जे अयोध्याजी जएबासँ पहिने  हमसभ पूर्णतः सात्विक भए जाइ।”

“बातो सही। कारण हमरा दुनू बेकतीकेँ एक दिन पहिने व्रत,फलहार कए प्रायश्चित समारोहमे सामिल होमए पड़ल।दोसरो दिन फलाहरेपर दिनभरि रहए पड़ल।साँझमे सिद्ध अन्न,मुदा पूर्णतः सात्विक,बिना प्याजु,लहसुनकेँ भोजन करबाक छल।”

हमसभ यथासाध्य एहि नियमसभक पालन करैत आठ आ  नओ फरबरीक आयोजित प्राणप्रतिष्ठा कार्यक्रममे सामिल भेलहुँ।ओहिठाम तीनटा मूल्यवान किताबसभ सेहो मोफतमे भेटल।किताबसभ स्थानीय लोकसभ द्वारा निःशुल्क वितरण करबाक लेल देल गेल छल। मुदा,बादमे व्यवस्थामे किछु परिवर्तन भेल आ मोट-मोट किताबसभ ओहिठामसँ हटा देल गेल।हमसभ तँ अपन पसिंदक किताबसभ लए ओकरा अपन झोरामे राखि लेने रही।

प्रायश्चित

प्राणप्रतिष्ठासँ पूर्व एक दिन पहिने प्रायश्चित कार्यक्रमक उद्येश्य यज्ञमे सामिल भए रहल जजमानलोकनिकेँ सभ तरहेँ शुद्ध करब छल।एहि कार्यक्रममे सामिल होएबाक लेल हमसभ भोरे नओ बजे कार्यक्रमस्थलपर पहुँचि गेल रही। मुदा,ताबे बहुत कम लोक आयल रहथि। अस्तु,किछु विलंबसँ ई कार्यक्रम प्रारंभ भेल। लगभग साढ़ै बारह बजे ई कार्यक्रम समाप्त भेल।तकर बाद हमसभ वापसि अपन घर आबि गेलहुँ।आइ आब किछु नहि करबाक छल। दोसर दिन फेर नओ बजे हमसभ ओहिठाम पहुँचलहुँ।आइ पाँचटा परिवार  जजमान लेल नामित रहथि।मुदा,कार्यक्रम शुरू होएबा धरि मात्र तीनटा परिवार आबि सकल रहथि।हमरा बगलमे एकटा ओकील साहेब सपरिवार जजमान रहथि। पंडितजी हमरा सामने रहथि आ हमरा पूजाक विधि-विधान बुझबथि आ हम तदनुकूल काज करी। मुदा ओ ओकील साहेबपर उचित ध्यान नहि दए पाबथि।तकर मूल कारण रहैक जे ओ कनी फटकी बैसल रहथि।ओ अपन उपेक्षासँ बहुत परेसान भए गेलथि आ चिकरि उठलथि-

“ई की भए रहल अछि?हमसभ एहिठाम व्यर्थ बैसल छी। हमरा नीकसँ पूजा नहि कराओल जा रहल अछि।ई तँ अन्याय अछि।”

“अहाँकेँ सेहो ललका डोरीसँ बान्हि देल गेल अछि। अहाँकेँ पूजाक बरोबरि फल भेटबे करत।”

“यदि से बात छैक तखन सभगोटेकेँ एहिना ललका डोरीसँ बान्हि दिअनु आ पंडितजी आगूसँ अपने सभक लेल पूजा करथु।मुदा,से तँ ओ करैत नहि छथि। एहि स्पष्ट भेदभावक लेल हुनका प्रायश्चित करबाक चाहिअनि।”

“हमरासभसँ गलती भेल।”-मुख्यपंडितजी स्थितिक गंभीरता बूजि तुरंत एकटा पंडितजीकेँ हुनको सामने बैसा देलनि। तकर बाद हुनको कोनो सिकाइति नहि रहलनि।पूजाक कार्यक्रम लगभग तीन घंटा चलल।तकर बाद हमसभ अपन घर वापस आबि फलाहार केलहुँ।रातिमे सात्विक भोजन केलहुँ आ भोरे अयोध्या जएबाक लेल झोरासभकेँ ठीक करबामे लागि गेलहुँ।

यद्यपि वंदे भारत ट्रेन दिल्लीसँ अयोध्या जएबाक लेल बहुत सुगम आ बढ़िआँ ट्रेन अछि,मुदा एकर आनन्दविहार टीसनसँ खुजबाक समय(भोरे छओ बाजि कए दस मिनट)  सही नहि अछि।जाड़क मासमे ओहि ट्रेनकेँ हमर घरसँ पकड़बाक लेल भोरे पाँच बजे प्रस्थान करब जरू अछि। मुदा हमसभ एहि लेल अवधारि लेने रही। भेल जे शुरूएमे कनी दिक्कति होएत बादमे फएदे फएदा रहत।कारण हमसभ दूपहर अढ़ाइ बजे अयोध्याजी पहुँचल रहब।तकर बाद मंगले दिन कए हनुमानगढ़ीमे दर्शन करब।यदि बहुत थाकि गेल रहब तँ आओर स्थानसभ जाएब।भगवान रामक जन्मस्थानपर नवनिर्मित मंदिरपर दोसरे दिन जाएब,से तँ पहिनेसँ निर्धारित छल।तकर बादे कोनो आनठाम जाएब।

ओहि दिन भोरे हम साढ़तीन बजे उठि गेलहुँ। हमर श्रीमतीजी तँ पहिने उठि कए बैसल रहथि। हम पुछलिअनि तँ ओ कहलथि—

“हम तँ राति भरि बैसले रहि गेलहुँ। निठ्ठाहे निन्न नहि भेल।”

हमसभ जल्दी-जल्दी तैयार भए गेलहुँ।चारि बजे भोरे तँ चाह पीबि रहल छलहुँ।स्नान,ध्यान तँ भइए गेल रहए।तकर बाद हमसभ कनी काल हीटरपर हाथ सेकलहुँ कि घंटी बाजल-टन-टन-टन।माने वाहनचालक आबि गेल। आब कोन चिंता? ठीक साढ़ेचारि बजे भोरे हमसभ आनन्दविहार टीसनक लेल अपन कारसँ प्रस्थान केलहुँ।

रस्ता एकदम खाली छल। रातुक वातावरण अकनो छलहे। कतहु-कतहु कार,टैक्सी,मोटर साइकिलसँ अबैत -जाइत यात्रीलोकनि देखा जाथि।कतहु कोनो अवरोध नहि रहबाक कारण हमसभ पैंतालिसे मिनटमे नन्दविहारटीसनक मुख्यद्वारिपर पहुँचि गेलहुँ।हमसभ बहुत आसानीसँ सामानसभ सहित अपन ट्रेन पकड़बाक लेल चिन्हित प्लेटफार्मपर पहुँचि गेलहुँ।तकर बीस मिनटक बाद वंदे भारत ट्रेन हुंकार भरैत टीसनपर लागि गेल।हमरसभक डिब्बा नंबर बीस सभसँ अंतमे छल। ओही हिसाबसँ हमसभ प्लेटफार्मपर बैसले रही।तेँ बिना कोनो असुविधाकेँ हमसभ ट्रेनमे अपन सीटपर पहुँचि गेलहुँ।

वंदे भारत ट्रेन

ओना अयोध्या जाए बला वंदे भारत ट्रेनमे चढ़बाक लेल हबाइ यात्रासँ बेसीए तत्परताक प्रयोजन भेल छल। कारण ट्रेन भोरे छओ बाजि कए दस मिनटपर आनन्दविहारसँ खुजबाक रहैक। ताहि लेल हमसभ पहिनेसँ बहुत तैयारी केने रही।तेँ समयसँ पहिने करीब सबा पाँच बजे हमसभ टीसन पहुँचि गेलहुँ। ट्रेनकेँ छओ नंबर प्लेटफार्मपर लगबाक रहैक। पहिने तँ चिंता होअए जे ओहिठाम कोना पहुँचब।संगमे बहुत भारी बैग छल।छोट-छोट कैकटा सामान से छल। ऊपरसँ श्रीमतीजीकेँ घुटनामे समस्या से रहैत छनि। आइ-काल्हि कनीक अनुकूल भेल छनि।विदति केलासँ कहीं बढ़ि ने जानि। मुदा हमसभ सुरक्षित आ बहुत आरामसँ जल्दीए प्लेटफार्म नंबर छओपर एस्कलेटरक सहायतासँ पहुँचि गेलहुँ।एकटा कूली कइए लेने रही। ओ हमरासभकेँ लेने देने सही जगहपर ठाढ़ कए देलक।कनीके कालमे अत्यंत नूतन सजल-धजल डिब्बाबला ट्रेन आबि कए प्लेटफार्मपर लागि गेल। हमरासभक डिब्बा नंबर बीस सभसँ पाछू रहए।हमसभ जल्दीए अपन-अपन सीटपर जा कए बैसि गेलहुँ। सामान नीचाँ राखि देल गेलैक। आब की? लागि रहल छल जेना एकटा महत्वपूर्ण किला फतह भए गेल अछि।

वंदे भारत ट्रेनक डिब्बा नंबर बीसक सीट सख्या ३८,३९पर हमसभ बैसि गेल रही। ऊपरमे बैग राखि देल गेलैक। यात्रीसभ अपन-अपन सीटपर बैसि गेलथि। ठीक छओ बाजि कए दस मिनटपर ट्रेन खुजि गेल। हमसभ भोरुका चाह नहि पीने रही। जलखै तँ करबाक नहि छल,कारण आइ हमरालोकनिकेँ मंगलक उपास छल। थोड़बे कालक बाद जखन आर यात्री लोकनिक लेल जलखै परसा रहल छलहुँ,हमहूँ चाहक आग्रह केलिऐक।से ओ सहर्ष पूरा केलक।हमसभ यथेष्ट मात्रामे चाह पीबि संतुष्ट भेलहुँ। डिब्बा नंबर बीस अंतिम डिब्बा छल आ ओहिमे मात्र एक्केटा अंग्रेजी स्टाइलक पैकाना रहैक। पैखानाक बाहर सभ कोठरीमे एकटा सफाइकर्मी तैनात कएल गेल छल।करीब सएटा यात्रीक बीचमे एक्केटा पैखाना रहैक। आन डिब्बासभमे दूटाक पैखाना रहैक। मुदा प्रायः ट्रेनक अंतिम डिब्बा होएबाक कारण एहि डिब्बामे एक्केटा  अंग्रेजी पैखाना रहैक। हम कैक बेर ओहिठाम धरि जाइ आ वापस भए जाइ।कारण सदिखन केओ ने केओ ओहिमे बैसले रहैत छलाह। पैखानाक बाहर सदिखन किछुगोटे पाँतिमे ठाढ़ रहैत छलाह। तेहन हालतिमे की करितहुँ?वापिस अपन सीटपर चलि आबी।आखिर साढ़ि एगारह बजे बरदाससँ बाहर बुझाएल। भोरे साढ़े चारि बजे डेरा छोड़ने रही।तखनसँ पाँच घंटा समय बीति गेल छल। तेँ आब अनिवार्य भए गेल छल। संयोगसँ एहि बेर  पैखाना खाली छल।हम तुरंत भीतर चलि गेलहुँ। अंग्रेजी स्टाइलक पैखाना ततनीटा छल जे ओहिमे बैसएमे बहुत असौकर्य भए रहल छल। संक्रमणक डर सेहो भए रहल छल। मुदा कएल की जा सकैत छल?वापिस सीटपर आबि बहुत आश्वस्त लागि रहल छल।ट्रेन सरपट भागि रहल छल। दुनू दिसक प्राकृतिक दृश्य देखैत जाउ,आगू बढ़ैत जाउ।शुरूमे तँ यात्रा बहुत नीक लागि रहल छल।मुदा,जेना-जेना समय बीतल,आब बैसनाइ मोसकिल लागि रहल छल।हमर श्रीमतीजी तँ बहुत परेसान बुझेलीह। ओ कहलीह-

“आब दोबारा एहि ट्रेनसँ यात्रा नहि करब।आठ घंटा लगातार बैसल रहि यात्रा करब सुखद अनुभव नहि अछि।”

ठीक दू बाजि कए पचीस मिनटपर ट्रेन अयोध्या कैंट टीसनपर पहुँचि गेल।हमसभ सामान सहित बाहर निकललहुँ। बड़ी काल चललाक बाद हमसभ प्लेटफार्मसँ बाहर भेलहुँ। ओहिठाम कैकटा टैक्सी,आटो बलासभ घेरि लेलक।हम सभसँ पहिने होटल श्रीरामइनक व्यवस्थापकसँ संपर्क केलहुँ,ओहि स्थानक सही जनतब प्राप्त केलहुँ ।तकर बाद एकटा आटोसँ होटलक लेल प्रस्थान केलहुँ। अफसोचक बात जे स्थानीय होइतहुँ आटो बलाकेँ होटलक जनतब नहि रहैक। ओकरा कैक बेर व्यबस्थापकसँ गप्प करओलिऐक। तइओ ओ भुतलाइते रहल।आखिर हमसभ किछु विलंबसँ होटल पहुँचि सकलहुँ।

होटल श्रीरामइनक जानकारी हमरा श्रीरामजन्मभूमि ट्रस्टक वेबसाइटसँ भेटल छल।ओतए उपलब्ध फोन नंबरपर हम फोन केने रहिऐक।फोनपर होटलक संचालक दूबेजी गप्प केने रहथि।ओ सुपरडीलक्स कोठरीक दू हजार प्रतिदिन किराया कहने रहथि,जखन कि आनलाइन बुकिंग लेल बहुत अधिक किरायासभ देखबामे आएल छल। हम तुरंत अपन कार्यक्रमक अनुसार एकटा कोठरी आरक्षित करबाक आग्रह केलिअनि जे ओ मानि गेलथि।जखन अयोध्या जएबाक समय लगचिआ रहल छल तखन हम फेर हुनकासँ एहि बातक पुष्टि केलहुँ। तकर बादे हमसभ अयोध्याक लेल प्रस्थान केने रही। अयोध्या कैंट ट्रेनसँ उतरबाक बाद टेम्पुसँ भूतलाइत-तुतलाइत  हमसभ आखिर होटल पहुँचिए गेलहुँ। मुख्य सड़कसँ कनी हटि कए ओ होटल छल।दुबेजीक स्थानपर एकटा दोसर सज्जन हमरासभकेँ भेटलाह।दूबेजी कोनो बिआह कार्यक्रममे सामिल होएबाक लेल गेल रहथि।हुनका  एबजमे  एकटा दोसर व्यक्त हमरा लोकनिक स्वागत केलनि आ कोठरीक कुंजी देलनि।बादमे ओएह अयोध्या यात्रामे हमर मार्गदर्शकक काज केलनि।हम एहि बातसँ चकित रही जे होटलमे कोठरीक कुंजी देबासँ पहिने ओकर खातामे हमर पता आदि किछु नहि लिखल गेल,ने हमरासँ कोनो परिचय पत्र मांगल गेल।हम एहि विषयमे पुछबो केलिऐक तँ ओ कहलनि –“कोनो बात नहि।अहाँ अपन पता आदि विवरण ह्वाट्सअपसँ पठा देब। ”एहि बातपर बेसी माथापच्ची करब ठीक नहि बुझाएल।भेल जे भए सकैत अछि जे बादेमे ओ कएल जाइत होइक।मुदा जएबा काल धरि से सभ किछु नहि देखाएल।जाइत काल हम उचित भुगतान केलहुँ आ अपन सामान लए कए होटलसँ बिदा भए गेलहुँ।

हमसभ जल्दीए अपन आवंटित कोठरी संख्या ‍११२मे पहुँचि गेल रही।ओहि कोठरीमे हमरसभक सामानसभ पहुँचा देल गेल।ओ कोठरी बेस अइल-फइल छल। कोठरीसँ संबद्ध शौचालयमे सभ सुविधा छल। पलंग,गद्दा सभ एक नंबर। मुदा,फ्रीज,एसी,टीवी नदारद छल। “इएह छी सुपरडिलक्स कोठरी?”हम मोने-मोन सोचलहुँ। फेर भेल जे हमरासभकेँ दुइए दिन तँ रहबाक अछि।भगवान रामक दर्शन भए जाए।हनुमानगढ़ी सहित आर-आर प्रसिद्ध स्थानसभ देखि ली।हमरसभक उद्येश्य पूर्ण भए जाएत।तेँ हमसभ कोठरीसँ बेसी मार्गदर्शकक जोगारमे लागि गेलहुँ।

हमसभ ओतए किछु काल विश्राम केलहुँ ।तकर बाद हनुमानगढ़ी जएबाक व्योंतमे लागि गेलहुँ। मार्गदर्शकजीसँ पहिने गप्प भइए गेल छल। ओ कहलनि जे मंगल होएबाक कारण आइ हनुमान गढ़ीमे बहुत भीड़ होएतैक,मुदा दू सए टाका खर्च केलापर हम अहाँकेँ आसानीसँ दर्शन करा देब।दू सए टाका आटोबलाकेँ सेहो देबाक होएत। हमसभ तुरंत तैयार भए गेलहुँ।कारण ओहिठामक भीड़क बारेमे पहिनेसँ बूझल छल। हमरासभ मंगलक उपास से केने रही।समयसँ दर्शन भए जाएत तँ आगू परना करबामे सेहो नीक रहत।

हमसभ साढ़े चारि बजे होटलसँ मार्गदर्शकजीक संगे हनुमानगढ़ी दर्शन लेल आटोसँ बिदा भेलहुँ आ घंटा भरिसँ पहिने मानस भवनमे भोजन लेल पहुँचि गेलहुँ।कहब जे एतेक जल्दी से सभ भेल केना? तँ सुनि लिअ। हमरासभकेँ मार्गदर्शकजी हनुमानगढ़ी मंदिरक पाछू बाटे अनलनि आ  इसारासँ आगी बढ़ि जएबाक लेल कहलनि। किछुए सीढ़ी चढलाक बाद हमसभ हनुमानजीक सामने पहुँचि गेलहुँ। मुदा हमसभ भीड़क उल्टा दिससँ आएल रही।एकाध गोटे टोकबो केलनि। मुदा जेना-तेना आगू बढ़ि गेलहुँ।कनीके चललाक बाद हमसभ मुख्य भीड़मे सामिल छलहुँ।सभ हनुमानजीक जयकारा लगा रहल छलाह।हमहूँ हनुमानजीक ठीक सामने पहुँचि श्रद्धापूर्वक हुनकर प्रार्थना केलहुँ।हमर श्रीमतीजी तँ संगे रहबे करथि। दस मिनटक भीतरे हमरसभक काज भए गेल छल। हमसभ आब थाकिओ गेल रही।तेँ आर ठाम नहि जाए,सोझे अपन होटल वापस पहुँचि गेलहुँ।एहि तरहेँ हनुमान गढ़ीमे मंगल दिन कए हनुमानजीक दर्शन करबाक स्वप्न साकार हुनके कृपासँ संपन्न भेलासँ हमसभ अतिशय प्रसन्न  संतुष्ट रही।

प्रात भेने हमसभ सात बजे श्रीराम जन्मभूमि मंदिरपर जएबाक कार्यक्रम बनओने रही।मुदा,भोरे उठलाक बाद होटलमे पानिक आपूर्ति वाधित बुझाएल। होटलक व्यवस्थापककेँ फोन केलिअनि । ओ प्रयासो केलनि।मुदा,पानिक आपूर्ति शुरू होएबामे  एकघंटा समय लागि गेल। हमसभ सात बजेक बाद आठ बजे धरि राममंदिर लेल बिदा भए सकलहुँ। कोठरीसँ होटल परिसरमे बाहर गेलाक बाद एकटा आटो लागल देखाएल।

“हमसभ तँ टैक्सीक बात केने रही।”

“टेक्सीसँ बढ़िआँ इएह रहत।कारण बहुत ठाम गली बाटे जएबाक होइत छैक। ताहि लेल आटो  बेसी उपयुक्त सबारी होइत अछि।”

“मुदा एहि लेल दू हजार रूपया भरि दिनक तँ बेसी होएत।हमरा दुपहरिए धरि घुमा देथि , हम ताहि लेल आठ सए देबनि।बादमे देखल जेतैक।”

“जे अहाँक विचार।”

हमसभ मार्गदर्शकजीक संगे आटोसँ बिदा भए गेलहुँ। मुदा,बादमे ओहि आटो बला आ मार्गदर्शक,दुनूक व्यवहार बहुत नीक बुझाएल।संगे ओसभ हमरालोकनिकेँ मंदिरे-मंदिरे बहुत नीकसँ दर्शन करबैत रहल। तेँ श्रीमतीजीक परामर्शपर ओही आटोकेँ दिनभरि लेल राखि लेलहुँ।संगमे मार्गदर्शकजी तँ रहबे करथि।एहिमे किछु पैसा जरूर खर्च भेल,मुदा ओ सभ बहुत नीकसँ हमरासभकेँ अयोध्या आ लगपासक प्रमुख स्थानसभक दर्शन करा देलक,जे अन्यथा संभवतः संभव नहि होइत।

रामजन्मभूमि मंदिर

एहनो दिन हेतैक जे हमसभ सद्यः रामजन्मभूमिपर बनल श्रीरामक मंदिरमे स्थापित हुनकर दर्शन करब,से के सोचि सकैत छल? जुग-जुगसँ एहि मंदिरक लेल अनेक प्रयास कएल गेल।कतेको बेर युद्ध लड़ल गेल। कतेको लोक अपन प्राण गमा देलनि। सालक-साल देशक विभिन्न न्यायालयमे एहि विषयक मोकदमा चलैत रहल। ततबे नहि,सालक-साल सौंसे देशमे एहि मंदिरक निर्णक लेल आंदोलन कएल गेल।मुदा,समाधान उच्चतम न्यायालयक निर्णयक बादे संभव भेल।तकर बाद तँ ओहिठाम मंदिर निर्माणक प्रक्रिया जे शुरू भेल से सालों चलैत रहल। जनबरी २०२४मे एहि मंदिरक भूतलमे भगवान रामक वालरूपकेँ समारोहपूर्वक स्थापित कएल गेलनि। तकर बाद तँ ओहिठाम दर्शन करबाक लेल लोक जे हुजुम लागल से वर्णन करब मोसकिल थिक। हमसभ एहन भीड़मे दर्शन नहि करबाक निर्णय केलहुँ। जखन भीड़ कम भए गेल आ ऊपरो तलसभमे मंदिर बनि गेल,मंदिरक मंडपपर ध्वज विधिवत फहरा गेल,तखन हमसभ ओहिठाम जएबाक लेल कार्यक्रम बनाबए लगलहुँ।  ताही सोचक परिणाम छल जे आइ हमसभ अयोध्यामे रामजन्मभूमिपर बनल श्री राम मंदिर परिसरमे पहुँचि गेल छी। मार्गदर्शकक इच्छानुसार हम श्रीमतीजीक लेल एकटा ह्वील चेयर बुक करओलहुँ। नियमानुसर हम हुनका संगे जा सकैत छलहुँ। ओना हमरा बुझल छल जे सत्तरि सालसँ बेसीक लोककेँ एकटा सहायकक संगे त्वरित दर्शनक व्यवस्था छैक। हम ई बात मार्गदर्शकजीकेँ कहलिअनि तँ बजलाह-

“जखन अहाँकेँ त्वरित दर्शन भइए रहल अछि तखन चिंताक कोन बात छै?”

हम निश्चिंत  भए ह्वीलचेयरक संगे-संगे बिदा भेलहुँ। सचमुचकेँ कतहु कोनो भीड़ नहि छल। ओहुना ओहि दिन सामान्यो पाँतिमे बहुत कम लोक देखेलथि। भूतलमे बनल श्री रामक ममूर्तिक दर्शनतँ बहुत नीक जकाँ भए गेल। मुदा जखन ऊपर तलपर जाए लगलहुँ तखन पुलिस रोकलक।कहैत अछि-“भीआइपी पास अछि?”

हमरासभकेँ तँ से नहि रहए।तखन की होएत?पुलिसकेँ ई बात कहलिऐक। मुदा ओ साफे नठि गेल। फेर लगेमे बैसल एकटा बएसगर पुलिसकेँ बहुत आग्रह केलिऐक।

“हमसभ वृद्ध थिकहुँ।एहिठाम फेर कहिआ आबि सकब कि नहि तकर कोन ठेकान?हमरासभकेँ भीआइपी पासक चक्कर नहि बूझल छल।भेल जे ह्वीलचेयरक संगे हमसभ ऊपरो चलि जाएब।आब अहीं कोनो उपाय करू जाहिसँ हमसभ ऊपर जा कए भगवानक दर्शन कए सकी।”

ओ हमरसभक बात मानि गेल।ओ  लगमे ठाढ़ पुलिसकेँ इसारासँ कहलकै।तकर बाद हमसभ धराधर मंदिरमे प्रवेश कए सकलहुँ। सामनेमे रामपरिवारक अद्भुत दृश्य देखि अचंभित रही। लागि रहल छल जेना भगवान श्रीराम सपरिवार सामनेमे सिंहासनपर विराजमान छथि, हमरालोनिकेँ आशीर्वाद दए रहल छथि। हमसभ बहुत मोनसँ प्रार्थना केलहुँ  अत्यंत संतुष्टिक संग ओहिठामसँ वापसि भेलहुँ।वापसी काल ओहि पुलिसकेँ बेर-बेर धन्यवाद देलिऐक।

ओहिठामसँ नीचाँ उतरलाक बाद देबालपर रामराज्याभिषेकक  भव्य  जीवंत चित्र उकेरल गेल छल।ई दृश्य देखि हमरा अश्रुपात होमए लागल।मोनमे भेल जे भगवान रामक संगे कतेक अन्याय भेलनि,कतेक कष्ट ओ सहलनि?केहन अनुपम ओ क्षण रहल होएत जखन की ओ लंका विजयक बाद जानकीजीक संग अयोध्यामे राजा बनि रहल छलाह।असलमे संपूर्ण राम मंदिर परिसर,ओहिठाम बनल मंदिरसभ आ तकर भीतरमे स्थापित मूर्तिसभ अवर्णनीय अछि,अद्भुत अछि ।फटकीएसँ ऐहि मंदिरक गगनचुंबी धाजा देखाइत अछि। ओकरा देखिते मोन गर्वसँ भरि जाइत अछि।लगैत अछि जे अयोध्या आबि हमरालोकनिक जीवन सफल भए गेल।एकटा चीर अभिलाषा बहुत नीकसँ आइ पूर्ण भए गेल।

सरयू नदीमे नौकायान

रामजन्मभूमि मंदिरमे दर्शनक बाद हमसभ सोझे सरयू नदीक घाटपर पहुँचलहुँ।सरयू नदीक साफ,स्वच्छ जल देखि मोन प्रसन्न भए गेल। ओहिठाम पर्यटन विभागक जहाज लागल छलैक।किछु मोटर नाओसभ सेहो लागल रहैक। पर्यटन विभागक जहाजक किरया साढ़े तीनसए रहैक,फेर ओ देरीसँ खुजितैक।मोटर नाओ सएटाकामे घुमा दैत आ तुरंते खुजबो करितैक।तेँ हमसभ मोटरनाओपर बैसि गेलहुँ।ओहिमे किछु यात्री पहिनेसँ बैसल रहथि।हमसभ बैसलहुँ आ नाओ खुजि गेल। तकर बाद तँ आनन्दे-आनन्द छल। चारू दिस अद्भुत दृश्य छल।सरयू नदीक दोसर दिसक दृश्यसभ देखा रहल छल।आगू-पाछु चलैत नाओ सभ ।हमसभ बहुत फटकी धरि ओहि नाओमे घुमैत रहलहुँ ।लगभग आधाघंटाक बाद वापस ओतहि आबि गेलहुँ जाहिठामसँ बिदा भेल रही। तकर बाद आटोबला आ मार्गदर्शकजीक संगे आगूक भ्रमणपर बिदा भेलहुँ।एगारह बाजि रहल छल। भेल यदि जलखै करए लागब तखन मंदिरसभ बंद भए जाएत।तेँ पहिने से काज कए ली तकर बाद एक्के बेर भोजने कए लेब। सरयओनदी घाटसँ बाहर होइते हमसभ सीताक रसोइ गेलहुँ। ओहिठाम निरंतर  भंडारा चलैत रहैत अछि। एकटा बाबाजी हमरासभसँ सटि गेलाह। पहिने तँ भंडाराक बारेमे बतबैत रहलाह ।तकर बाद ओहिमे किछु योगदान करबाक लेल प्रेरित करैत रहलाह। सामनेमे एकटा बृद्ध बाबा जप करैत बैसल रहथि। ओ हमरासभकेँ ओहि बाबा लग बैसा देलाह,फेर अपन खाता खोलि कए कहए लगलाह-

“एहिमे भंडाराक लेल योगदान केनिहारसभक विवरण लिखल जाइत अछि। अपने जे इच्छा होअए से कए कए सकैत छी।कोनो बन्हौट नहि अछि।”

आब कहू।सामने बृद्ध बाबाजी जप कए रहल छथि।हमसभ मंदिरमे बैसल छी। ओ खाता खोलने तैयार छथि। माने स्पष्ट छल।मुदा,हमरासभकेँ से सभ किछु करबाक तँ नहि छल।तेँ चुचाप उठि गेलहुँ।हुनकर मोन कोनादनि भए गेलनि।माहौल देखि श्रीमतीजी कहलनि-

“किछुओ दए दिऔक।”

हम अपन जेबीसँ सएटाका निकालि ओहिठाम राखि देलिऐक आ बिदा भए गेलहुँ। ओहिसँ पूर्व सीताकुंड देखलहुँ।कहल जाइत छैक जे सीताजी एहीमेसँ जल निकालि भानस करैत छलीह। हुनकर रसोइक सामानसभ सेहो किछु राखल देखाएल।सामने एकटा भवनक निर्माण भए रहल छल। पता लागल जे राम मंदिर आंदोलनमे मारल गेल कारसेवक लोकनिक स्मारक ओहिमे बनाओल जा रहल अछि।ओहिठामसँ बाहर निकलि हमरा लोकनि कनक भवन,वाल्मीकि रामायण भवन,दसरथ भवन गेलहुँ। वाल्मीकि रामायण भवनक विशेषता ई अछि जे ओकर देबालसभपर संपूर्ण वाल्मीकि रामायण लिखल अछि। आगू दिस कोनमे मोटाक-मोटा रामनाम लिखल रजिष्टरसभ राखल छल। असलमे ओ रामनाम बैंकक नामसँ जानल जाइत अछि।देश भरिसँ रामनाम लिखि-लिखि भक्तलोकनि स्थानीय संपर्कक माध्यमसँ रामनाम बही ओहिठाम पठबैत छथि।ई अपना-आपमे अद्भुत बुझा रहल छल। लोकक श्रद्धा आ भक्तिक अनुपम दृष्टान्त ओतए हमरालोकनिक सामनेमे उपस्थित छल।

आटो बला आ मार्गदर्शकजी बीच-बीचमे देखाइत मंदिरसभक बारेमे बतबैत रहैत छलाह।बारह बजै बला छलैक।सभठाम जल्दी-जल्दी जाइ,कारण थोड़बे कालमे  मंदिरसभक कपाट बंद भए जाएत।बीच-बीचमे एकाधटा आर महत्वपूर्ण मंदिरसभ देखैत-सुनैत हमसभ वापसीमे मानस भवन पहुँचलहुँ। मानस भवन बेस विस्तृत अछि। ओहिमे रहबाक सुविधा सेहो छैक। एसी डबल बेड कोठरीक एक दिनक किराया २१०० छैक। मुदा,हमसभ तँ पहिनेसँ  दोसर ठाम रहि रहल छलहुँ। ओहिठाम सात्विक भोजनक उत्तम प्रबंध रहैत अछि। तेँ हमसभ अयोध्यामे बेसी काल ओतहि भोजन करी।ओतए जनकपुरसँ आएल एकटा मैथिल परिवार सेहो भोजन करैत छलाह। ओ सभ ओहीठाम ठहरल रहथि।अयोध्याजीमे जनकपुरसँ आएल मैथिल परिवारकेँ देखि बहुत नीक लागल।हुनकासभसँ कनीकाल बतिएबो केलहुँ।भोजनोपरांत अपनसभ अपन डेरापर पहुँचि गेलहुँ।आटोबलाकेँ तीन बजे आबए कहि देलिऐक जाहिसँ आर-आर स्थानसभ देखि सकब।

हमसब तीन बजे आटोसँ अयोध्या भ्रमणक दोसर खेपपर निकलबाक योजना बनओने रही। ताही हिसाबसँ हमसभ तैयार भए कोठरीसँ बाहरो भेलहुँ।मुदा आटोबला अखन रस्तेमे छल। ओ बीस मिनट देरीसँ पहुँचल।अबिते कहलक-

“ततेक थाकि गेल रही जे भोजन करिते सुता गेल।”

“कोनो बात नहि।कनी-मनी आगू-पाछू होइते रहैत छेक।”

तकर बाद हमसभ मार्गदर्शकजीक संगे सभसँ पहिने गुप्तार घाट पहुँचलहुँ। ओहिठामक परिचय देबाक काज नहि अछि। तथापि,एतबा कहि दैत छी जे राम भरत,शत्रुघ्न आ समस्त अयोध्यावासीलोकनिक संगे एतहि जलसमाधि लेने रहथि।एहिसँ पूर्व लक्ष्मण प्राणायाम कए अपन प्राण परित्याग कए देने रहथि।कतेक दुखद रहल होएत ओ दिन।मुदा जे भावी छल से भेल। किछु साल पूर्व धरि ओ स्थान बहुत सुनसान रहैत छल। मुदा,आब से बात नहि बुझाएल। ओहिठाम बहुत रास नाओसभ लागल छल।ऊपर बहुत रास छोट-मोट दोकानसभ देखाएल। यात्रीसभसँ स्थान भरल छल। सामने ऊपरमे एकटा प्राचीन मंदिर अछि। हमसभ ओहिठाम थोड़े काल रहलहुँ,फोटो घिचओलहुँ आ वापसि बिदा भए गेलहुँ। कनीके आगू गेलाक बाद एकटा छोटसन मंदिर देखाएल। स्थानीय लोकसभ कहलनि जे ओतए भगवान रामक खराम राखल छल।तकर बादे ओ सरयूमे जलसमाधि लेल प्रस्थान केलथि।हमसभ ओहिठाम गेलहुँ। भीतरमे एकटा पादुकाक निसान जरूर देखाएल। ओहिठाम बहुत कम लोक भेटलथि।हमसभ थोड़े कालक बाद अत्यंत उदास मोनसँ ओहिठामसँ बिदा भए गेलहुँ।

आब हमसभ नन्दीग्राम बिदा भेलहुँ। सूर्यास्त लगीच छल। जाड़ बढ़ि रहल छल।हम टोपी नहि अनने रही। तेँ आटोपर चलबामे कनी बेसी परेसानी लागि रहल छल। मुदा,कएल की जाइत? जेना-तेना बरदास करैत आगू बढ़ैत गेलहुँ। नन्दीग्रामेमे लंका विजयक बाद अयोध्या लौटलापर भरतसँ रामक पहिल बेर भेंट भेल रहनि।ओहिठाम भरत मंदिर अछि। ओहिमे हमसभ दर्शन केलहुँ। कनीके फटकी एकटा छोटसन मंदिर अछि।कहल जाइत अछि जे ओहीठाम बनल सुरंगसँ भरत अयोध्या जाइत छलाह। एतेक ऐतिहासिक स्थानपर कोनो बेसी आकर्षक किछु नहि देखाएल।आब राति शुरू भए गेल छल।होइत छल जे जल्दी डेरा वापिस भए जाइ। मुदा रस्ता तँ कम होइत नहि। सूर्यघाटपर साढ़े छओ बजेसँ लेजर शो होइतए। ठीक ओही समय हमसभ तए पहुँचिओ गेल रही। आखिर टिकट लेलहुँ आ दुनूगोटे  उचित स्थानपर जा कए बैसि गेलहुँ।हमसभ ततेक थाकि गेल रही जे ओहिठाम बनल सूर्यमंदिरमे भीतर नहि जा सकलहुँ।बाहरेसँ प्रणाम कए लेलहुँ। थोड़बे कालमे लेजर शो प्रारंभ भेल जे आधा घंटा धरि चलैत रहल। कार्यक्रम बहुत आकर्षक आ ज्ञानवर्धक छल।

लेजर शो समाप्तिक बाद हमसभ सोझे डेरा दिस बिदा भेलहुँ। फेर मानसभवन लग आटो रूकल।हमसभ तहि भोजन केलहुँ आ डेरा आवि रात्रि विश्रामक तैयारीमे लागि गेलहुँ।

भोरे उठि-सुठि हमसभ अपन सामानसभ सरिएलहुँ। नित्यक्रमसँ निवृत भए ओलापर कार बूक करओलहुँ ।ठीक साढ़े सात बजे हमसभ लखनऊक लेल कारसँ प्रस्थान केलहि।हमसभ चाह रस्तेमे पीअब,से वाहन चालककेँ कहि देने रहिऐक। आधाघण्टाक बाद वाहन चालक सड़कक कातमे बनल चाहक प्रसिद्ध ढाबा लग कार रोकि देलक।हमसभ बहुत नीक चाह पीलहुँ आ लखनऊ दिस आगू बढ़ि गेलहुँ।रस्तामे अयोध्याजीक यात्रासँ जुड़ल प्रसंग स्मरण करैत बेर-बेर आनन्दित होइत रहलहुँ। धन्य रहथि राम जे हजारों हजारों वर्षक बादो अखनहु धरि लोकक मोनमे सद्यः विराजमान छथि,आराध्य छथि। धन्य छथि ओ सभ जे एहन महापुरुषक जन्मस्थानपर लाखक लाख लोकक स्वप्नकेँ साकार करओलथि।

 

 

८।३।२०२६

 

लखनऊ प्रवास

 

हमरालोकनि एगारह बजे लखनऊक होलीडे होम पहुँचि गेलहुँ।टेक्सीबलाकेँ आनलाइन भूगतान केलहुँ।  स्वागतीकेँ अपन कागज देखलिऐक। ओ तुरंत हमरसभक सामान कमरा नंबर ‍१०८मे पहुँचबा देलाह।बेस सुसज्जित   सभ तरहेँ सुबिधापूर्ण कोठरी देखि हमरा लोकनिक मोन प्रफुल्लित भए गेल।हमसभ कनी काल विश्राम केलहुँ आ श्री कौशल किशोर मिश्रजी(हमर पितिऔत भातिज) केँ फोन लगओलहुँ। ओ  लखनऊमे बहुत दिनसँ रहैत छथि  । मोतीलाल नेहरु इंजिनीयरिंग कालेज,इलाहाबादसँ सिभिल इंजिनीयर छथि।  उत्तरप्रदेस सरकारमे अधीक्षण अभियंताक पदसँ सेवानिवृत्त केलाक बादो कार्यरत छथिहे।हुनकासँ फोनपर गप्प भेल। हुनकर पड़ोसी) जे मधुबनी लग सीमा गामक छथि,बहुत दुखित छलखिन।हुनकर हृदयक शल्यक्रिया ओही दिन होएबाक छलनि।अस्तु,ओ आइ तँ नहि आबि सकताह।काल्हि जरूर अओताह,से कहलनि।

हमसभ भोजनक बाद कनी काल विश्राम केलहुँ ।तकर बाद हमसभ आटोसँ डॉ. भीमराव अंबेडकर सामाजिक परिवर्तन स्थल देखबाक लेल बिदा भेलहुँ।ओहीठाम गोमती नदीक कातमे रिभरफ्रांट बनल अछि जतए साँझमे घुमबाक लेल बहुत लोकसभ अबैत छथि।सटले फूडपार्क सेहो अछि। आटो बला पुछलक जे अहाँसभ पहिने केमहर जाएब?हमसभ पहिने रिभरफ्रांट देखबाक लेल आटोसँ उतरि गेलहुँ। गोमती नदीक काते-काते बनल पार्कमे लोकसभ घुमैत छथि,विश्राम करैत छथि। हमहूँसभ कनी काल ओहिठाम घुमलहुँ।तकर बाद डॉ. भीमराव अंबेडकर सामाजिक परिवर्तन स्थल चलि गेलहुँ। ओहिठाम प्रवेशक लेल टिकट लेबए पड़ैत छैक। टिकट लेलाक बाद हमसभ भीतरमे पैरे-पैरे यथासाध्य घुमैत रहलहुँ। ओहीमे एकदिस बड़ीटा सामियाना लागल छल। पता लागल जे काल्हि ओहिमे बड़का साहित्यिक कार्यक्रम होमए बला छैक।ई पार्क मात्र  एक स्थापत्य चमत्कार नहि अछि।अपितु, ई समता, न्याय आओर मानवाधिकारक भावनाक प्रतीक सेहो अछि।अम्बेडकर पार्कक निर्माण उत्तर प्रदेशक पूर्व मुख्यमंत्री श्रीमती मायावतीक कार्यकालमे भेल छल। एहि पार्ककेँ बनाबक मुख्य उद्येश्य  भारतक ओहि  महान नेता लोकनिक सम्मान करब थिक जे  सामाजिक न्याय, समानता आ दलित अधिकारक लिए संघर्ष केलनि।एहिमे प्रमुख छथि- डॉ. भीमराव अंबेडकर, कांशीराम, नारायण गुरु, ज्योतिबा फुले, आदि।

डॉ. भीमराव अंबेडकर सामाजिक परिवर्तन स्थल अद्भुत अछि। हमसभ  यथासाध्य एहिमे घुमलहुँ।थोड़े काल सुस्तेबो केलहुँ आ तकर बाद आटोसँ फूडपार्क दिस बिदा भेलहुँ। काते-काते दूबगली अनेक प्रकारक भोजन,जलखैसभक दोकान देखबामे आएल। ओहीमे बीचमे एकटा बिहारी व्यंजनक दोकान सेहो देखबामे एल।मुदा,ओहिठाम,आमिष भोजन सामग्री भेटैत छल। तेँ हमसभ वापस भए गेलहुँ। बेसी आमिष सामग्री बला दोकानेसभ देखाएल। शुरूएमे एकटा निरामिष  चाटक दोकान छल। मुदा,हमसभ किछु खेलहुँ नहि।  ओहिठामसँ सोझे अपन डेरा वापिस भए गेलहुँ।

आइ तेरह फरबरी २०२६ अछि।हमसभ स्नान-ध्यान,जलखैक बाद कौशलजीक प्रतीक्षा कए रहल छलहुँ। ओ कहने रहथि जे आइ अओताह,मुदा अएबाक समय नहि कहने रहथि। करीब एकघंटा धरि हुनकर प्रतीक्षा केलाक बाद श्रीमतीजी कहलनि –

“एना तँ हमसभ बैसले रहि जाएब।”

“तखन?”

“तखन की,हमसभ कतहु घुमबाक लेल निकलि जाइ।हुनकर बाट कतेक काल तकैत रहबनि।”

“बात तँ सही कहि रहल छी।मुदा ओ कहने छथि।अएबे करताह।यदि हमसभ निकलि जाएब आ ओ बीचेमे आबि गेलाह तखन?”

“तखन हमसभ वापस चलि आएब।हमसभ कोनो ततेक फटकी तँ जा नहि रहल छी।”

“बेस।बातो सही छैक।हुनका निश्चित समय कहबाक चाहै छलनि।तखन ओहि हिसाबे हमसभ अगिला कार्यक्रम बनबितहुँ। चलू,निकलि जाइत छी।बादमे देखल जेतैक।”

आखिर हमसभ बाहर भए गेलहुँ। कनीके फटकी एकटा टेम्पो बला(शाहजाद)  ठाढ़ छल।हम ओकरा पुछलिऐक-

“हमसभ लखनऊक मुख्य-मुख्य स्थानसभ घुमए चाहैत छी।तूँ चलबह?”

“किएक ने जाएब?हमर तँ काजे इएह अछि।”

“केमहर जेबहक आ कतेक किराया लेबहक?”

ओ एकसुरे पुरान लखनऊक दर्शनीय स्थानसभक नाम गना गेल। रुमी दरबाजा,शाही तालाब,सतखपे,नौबतखाना,हनुमान मंदिर,इमामबाड़ा,भूल-भुलैया,,,।

“से तँ बुझलहुँ,मुदा किरया कतेक लगतैक?”

“चलू ने।जे वाजिब बुझाए से दए देबैक।”

“फरिछएल बात नीक होइत छैक।”

“अखन बिदा होइत छी तँ दू-तीन बजे धरि वापस आबि सकब। सात सए रूपया दए देबैक।”

“ठीक छैक।”

हमसभ आटोपर बैसि गेलहुँ।रूमी दरबाजा,शाही तलाब,सतखपे,नौबतखाना देखलाक बाद हमसभ हनुमान मंदिर पहुँचलहुँ। प्रयागराज जकाँ ओतहु खधिआमे सुतल हनुमानजी छथि।हुनका प्रणाम कए हमसभ ओतए बैसले छलहुँ कि कौशलजीक फोन आएल-

“कहाँ छीऐ?हमसभ अहींक डेरापर आएल छी।”

“हमसभ तँ अहाँक एकघंटा बाट तकलहुँ।तकर बाद भेल जे कनी घुमि ली।”

“हम तँ कहने रही जे काल्हि आएब,,,।”

आब हुनका की कहितिअनि।

“अहाँ ओतहि रहू।हमसभ आबि जाइत छी।”

“हमही आबि जाइत छी।”

“कतेक समय लागत?”

“हमरा आधा घंटा लागत।ताबत ओतहि रहब।”

हमरासभकेँ भेल जे आधा घंटा ओहीठाम बैसल की करब?सटले बुद्धपार्क रहैक ।ओहिठाम जा कए बैसि गेलहुँ। एक-पाँच-सात  मिनट भेल होएत की हुनकर फोन आबि गेल।

“कतए छी?हमसभ तँ हनुमान मंदिर आबि गेल छी।”

“ओहिठामसँ सटले बुद्धपार्कमे बैसल छी।”

ओ एहिपर किछु-किछु फुसफुसेलनि।फेर कहैत छथि-

“आब ओतहि रहब।हमसभ आबि रहल छी।”

हम हुनकर परेसानी बुझि रहल छलिअनि।चिंता आटोबलाक सेहो छल।यदि कौशलजी अपना संगे चलबाक आग्रह केलनि तखन कोना की होएत?

“जे हेतैक,देखल जेतैक।”

हमसभ पार्कसँ बाहर भेले छलहुँ कि कौशलजी बड़काटा कारपर बैसल देखेलाह।मोन आनन्द भए गेल।हमरासभकेँ देखिते ओ कारसँ नीचाँ उतरि गेलाह,प्रणाम केलनि आ भेंट होएबाक सुयोगपर बहुत प्रसन्नता व्यक्त केलनि। हमरा तकबामे,डेरासँ ओहिठाम धरि पहुँचबामे,फेर हमरा लोकनि द्वारा स्थान  बदलि लेबाक कारण जे हुनका परेसानी भेल रहनि से हुनकर आकृतिपर झलकि रहल छलनि।मुदा हम आब कइए की सकैत छलहुँ?हँ,एतबा ध्यानमे आएल जे आगूसँ हमहीं हुनकासँ समय पक्का कए लेब जाहिसँ हुनका एहन परेसानी फेर नहि होनि।ओ आग्रह केलनि जे हमसभ हुनका संगे कारपर बैसि जाइ।हमसभ बात आटो बलाकेँ कहलिऐक।ओ सहर्ष तैयार भए गेल।कहलक-

“कोनो बात नहि।बाँकीक जगहसभ काल्हि घुमि लेब।अखन अहाँ किछु टाका दए दिअ।”

हम ओकरा तीन सए रूपया दए देलिऐक ।ओ प्रसन्नतापूर्वक से राखि लेलक ।हमसभ कौशलजीक संगे हुनकर कारपर बैसि अपन डेरा वापस बिदा भेलहुँ।रस्तामे लखनऊक प्रसिद्ध हनुमान मंदिर छल।हमसभ ओतए उतरि हुनकर दर्शन केलहुँ,प्रसाद चढ़ेलहुँ आ वापस अपन डेरा दिस बिदा भए गेलहुँ।कौशलजी हमरासभकेँ डेरा पहुँचा कए वापस चलि गेलाह।हम बहुत आग्रह केलिअनि जे संगे चलथि,कमसँ कम चाह पीबि लेथि।मुदा हुनका अपन पोताकेँ इसकुलसँ अनबाक रहनि।

“फेर आएब।”- से कहैत ओ कारपर सबार भए गेलाह। हमसभ अपन डेरा पहुँचि गेलहुँ।जाइत-जाइत हुनकर वाहन चालक हमरासभक कोठरीमे बड़ीटा मधुरक डिब्बा राखि गेल।हम बड़ी काल धरि कौशलजी,हुनकर शिक्षा आ उपलब्धिक विषयमे सोचैत रहि गेलहुँ। ओ जखन प्रयागराजमे मोतीलाल नेहरु इंजिनीयरिंग कालेजमे पढ़ैत रहथि तखन हमसभ ओतहि कर्मचारी चयन आयोगमे कार्यरत रही आ ‍१७ नयाममफोड़गंजमे रहैत रही। ओ बरोबरि हमरासभक ओहिठाम अबैत रहथि।हमहूँ कहिओ काल हुनकर छात्रावास जाइत रही। तहिआसँ आब कतेक समय बीति गेल।बीच-बीचमे कहिओ काल भेंट होइत रहल।एतेक दिनक बाद फेर भेंट भेलाक बादो ओहिना आपकता,ओहने सिनेह हुनकामे देखबामे आएल।आइ ओ किछु जल्दीमे रहथि।नीकसँ गप्पसप्प नहि भए सकल। काल्हि फेर अओताह,से कहि गेल छथि। से सोचि आनन्दमे रही।अपन कोठरीमे पहुँचि गेल रही।

“आब आइ किछु आर नहि,बस विश्राम।”

“ठीक छैक।”

आइ लखनऊमे हमरसभक तेसर दिन छल। कौशलजीकेँ फोन केलिअनि। ओ चारि बजेक आसपास अओताह।

“तखन हमसभ घुमि लैत छी।”

“ठीके कहलहुँ।”

आटोबलाकेँ फोन लगओलहुँ। ओ नओ बजे धरि आबि जाएत। हमसभ ताबत जलखै कए लेलहुँ। बाहर निकलले छलहुँ कि स्वागत कक्षसँ सटले ओएह आटोबला ठाढ़ देखाएल।हमसभ प्रसन्नतापूर्वक काल्हि बाँकी रहि गेल स्थानसभ देखबाक लेल बिदा भए गेलहुँ।हमसभ इमामबाड़ा आ भूलभुलैया काल्हि बाहरेसँ देखने रही।ओहिठाम फोटो घिचओने रही। आइ शुक्र दिन छलैक। ओहिठाम नमाजीसभक बहुत भीड़ हेतैक।रस्तासभ जल्दीए बंद भए जेतैक। फेर ओहिसभमे बहुत रास सीढ़ी चढ़बाक छैक जे हमर श्रीमतीजीकेँ कष्टकारी हेतनि,साइत पारो नहि लगतनि।तखन?बाहरेसँ हमसभ घुरि गेलहुँ। थोड़बे फटकी म्युजियम छल।हमसभ ओहिठाम गेलहुँ। ओहिठामम मिर्जा वाजिद अली शाहक खिस्सा सुनलहुँ। मिर्जा वाजिद अली शाह ( ३० जुलाई १८२२ – १ सितम्बर १८८७) अवधक एगारहम आ अंतिम राजा छलाह। ओ ९ वर्ष धरि(१३ फरवरी १८४७ सँ ११ फरवरी १८५६)  एहि पद पर रहलाह ।कहल जाइत अछि जे हुनका अंग्रेज घेरि लेने छलनि,मुदा एहि लेल भागि नहि सकलाह जे पनही पहिरेबाक लेल आदमी नहि आबि सकल।के अबैत?सभ तँ अपन जान बचबएमे लागल छल। आखिर ओ पकड़ि लेल गेलाह ।ई भेलैक नबाबी। म्युजियममे मार्गदर्शक गजब व्यक्तित्वक लोक छलाह। एहन विनम्र आ गरिमापूर्ण व्यवहार,बजबाक अद्भुत शैली लखनऊएमे देखल जा सकैत अछि।ओहिमे राखल चित्रकलासभक ओ विस्तारसँ वर्णन केलनि। हमसभ तकर खूब आनन्द लेलहुँ।ओहि चित्रसभमे ई विशेषता छल जे जेमहरे घुमबै तेमहरे ओकर मुँह घुमि जाइत छलैक। से एकटा,दूटा चित्रमे नहि।सभमे इएह हाल छल। अंतमे,हम मार्गदर्शकजीकेँ हुनकर शुल्क देलिअनि जे ओ बिना कोनो ना-निकुरकेँ राखि लेलनि आ बहुत आदरपूर्वक हमरासभकेँ ओहिठामसँ बिदा केलनि।ओ एहि बातसँ बहुत प्रसन्न भेल रहथि जे बच्चामे हमसभ दाहा देखए अपन गामक हाटपर जाइत छलहुँ,जे हमरा ओहिठामक लोकसभ दाहापर कबुलामे बद्धी चढ़बैत छलाह,जे हमरा टोलक लोकसभ दाहाक लेल चंदा सेहो दैत छलाह। ओ उत्सुकतामे पुछलाह-

“कतए घर भेलैक अपनेक?”

“बिहारक मधुबनी जिला।”

“मधुबनीक लोक होइते छथि एहने नीक।”

हुनकर प्रशंसासँ हम दंग छलहुँ। बाहरे लखनऊ!

”ओहिठामसँ वापसीमे हमसभ एकटा प्रसिद्ध दोकानपर किछु कपड़ासभ कीनलहुँ आ वापस अपन डेरा चल अबैत रहलहुँ। आटोबलाकेँ चारि सए रूपया देलिऐक।ओ बहुत प्रसन्न।एहि तरहेँ हमरा लोकनिक ओकरासँ सातसए रूपयामे पुरना लखनऊ घुमबाक  करार पूरा भए गेल।ओहो खुस,  हमहूँसभ प्रसन्न।

साँझमे निर्धारित समयपर कौशलजी पहुँचलाह।

चारि बाजि रहल छल।हमसभ कौशलजीक प्रतीक्षा कए रहल छलहुँ। आइ हुनका कोनो परेसानी नहि होनि,हमसभ अपन डेरापर समयपर उपलब्ध रही ताहि लेल पहिने सँ साकंछ छलहुँ। हम हुनका फोनो कए देलिअनि जाहिसँ कोनो प्रकारक दुबिधा नहि रहए। ओ समयसँ आबि रहल छथि,से जानकारी भेटि गेल छल। होलीडे होममे हुनका लेल कथीसँ स्वागत कएल जाइत।तथापि, चाहक लेल कहि देने रहिऐक। समयसँ ओ आबि गेलाह। हमसभ हुनका अपन डेरापर देखि बहुत प्रसन्न रही। आब की?शुरू भेल तरह-तरहक गप्प-सप्प। हुनकर धिआ-पुताक बारेमे विस्तारसँ जानकारी भेटल।ओना किछु-किछु तँ बुझले रहए।हुनकर आर्थिक संपन्नता आ बच्चासभक कुशल-समाचार जानि बहुत आनन्द भेल। लगभग दू घंटा धरि हुनकर सानिध्यक फएदा हमसभ उठबैत रहलहुँ। ओ आब वापस अपन घर जेताह। जाइत-जाइत अपना ओहिठाम आएबाक लेल हकार दैत गेलाह। मुदा हमरासभ लग आब एक्केटा दिन बाँचल छल। हमसभ प्रात भेने चंद्रिका भगवतीक दर्शन करबाक लेल बिदा भेलहुँ।आइ शिवराति छलैक।तेँ मंदिरमे बहुत भीड़ रहैक। तथापि,हमसभ नीकसँ दर्शन केलहुँ  आ साँझ पड़ैत-पड़ैत अपन डेरा वापस आबि गेलहुँ।काल्हि  लखनऊसँ दिल्ली वापस होएबाक छल। तेँ ओहि दिन कोनो आर कार्यक्रम नहि छल।दुपहरामे लगीचेक एकटा प्रसिद्ध भोजनालयमे हमसभ लखनवी बिरियानी खेलहुँ।हमरासभकेँ ओहिठाम आटोबला(शाहजादा)  लए गेल रहए। जाबे हमसभ भोजन केलहुँ,ताबे ओ हमरासभक प्रतीक्षा करैत रहल।तकर बाद वापस डेरा पहुँचा देलक।किराया पुछलिऐक तँ मात्र एकसए टाका मंगलक। हमरा लागए जे ओ बेसी कहत,कारण ओतेक काल धरि प्रतीक्षा केने छल।मुदा,ओ उचितो किरायासँ कनी कमे लेलक।हमसभ ओकर सज्जनता, विनम्रतासँ बहुत प्रभावित भेल रही।जाइत जाइत  एकटा आर घटना मोन पड़ि रहल अछि। भोरे टहलबाक क्रममे एकटा कोनटापर पराग दूधक पैकेट बेचैत एकटा सज्जन भेटलाह।हम हुनका लगपासक एटीएमक जानकारी पुछलिअनि।ओ बता देलाह।मुदा कोनो एटीएम काज नहि कए रहल छल।वापसीमे हुनका से कहलिअनि। ओ तरह-तरहक बात सभ बुझबए लगलाह जे एटीएमसँ जानि कए खराप राखल जा रहल छैक,आदि,आदि।दोसर दिन फेर ओ देखेलाह।हम हुनका कोनो नीक बिरियानी बला होटलक जानकारी पुछलिअनि। ओ कहलाह-

“हम पछिला पचीस सालमे कहिओ होटलमे नहि खेने छी।तेँ एहि बारेमे हम किछु नहि कहि सकैत छी।”हमरा हुनका बारेमे उत्सुकता बढ़ल।हम पुछलिअनि-

“अपने कोन काज करैत छलहुँ?”

“छोट-छिन सरकारी कारकून छलहुँ। हम कहिओ अधिकारीक दबाबमे नहि रहलहुँ।ठाँइ-पठाँइ जबाब दए दिऐक।परिणाम भेल जे जाही पदसँ नौकरी शुरू केलहुँ ताहीसँ सेवानिवृत्त भए गेलहुँ। किछु साल पूर्व एक्सीडेन्ट भए गेल।तकर बाद समयपूर्व स्वेच्छा सेवानिवृत्ति लए लेलहुँ। आब इएहसभ करैत छी।गुजर भइए जाइत अछि।”

हमरा हुनकर स्वभाव बुझबामे आब कोनो भांगठ नहि छल। हम मुस्काइत आगू बढ़ि गेलहुँ।

 दिन भरि विश्रामक बाद हमसभ रातिमे काशी विश्वनाथ एक्सप्रेससँ दिल्ली वापसी  होएब। ट्रेन बहुत विलंबसँ चलि रहल छल।ताहि हिसाबे दस बजे रातिक आसपास ओकरा लखनऊ टीसनपर अएबाक चाही। मुदा,‍१३९ नंबरपर फोन कएलापर पता लागल जे ट्रेन लखनऊ सही समयपर पहुँचत। हम से जानि चकित रही।मुदा भेलैक सएह।सही समयपर ट्रेन आबि गेल छल। ट्रेनक प्लेटफार्म अंतिम समयमे बदलि गेल रहैक,जाहिसँ कनी परेसानी भेल।ओही क्रममे एकटा ग्रैजुअट कूलीसँ भेंट भेल।ओ गजब व्यक्ति छलाह।एतेक शिक्षित रहितहुँ वर्षोंसँ कूलीक काज कए रहल छलाह।हम हुनकर फोटो खिचलहुँ आ परिचय सेहो पुछलिअनि।मुदा ओ आर किछु कहबासँ मना कए देलाह।“बस एतेक प्रयाप्त छैक।की करब बेसी बूझि कए…?”

आब हमर सभक लखनऊ प्रबासक अंत भए रहल छल। लखनऊ सहर,एहिठामक खानदानी लोकसभ,स्वादिष्ट भोजन आ कौशलजीक अपनत्व नहि बिसरल जा सकैत अछि।  हमसभ ट्रेनमे बैसि गेल छलहुँ। ट्रेन लखनऊ प्लेटफार्मसँ सही समयपर घुसकए लागल। मोने-मोन मर्यादा पुरुषोत्तम भगवान रामकेँ स्मरण करैत हमरा लोकनि वापस दिल्ली बिदा भए गेलहुँ।

रबीन्द्र नारायण मिश्र

‍१८।४।२०२६

 

 

 

 

 

 

 

 

 

 

 

 

 रामकृष्ण मिशन आश्रम, लखनउ